Ranchi, Lber:
Kum shi bynta ban weng ïa ki jingeh ha kaba ïadei bad ki lad ïohkam -ïohjam, ka sorkar Jharkhand ka la pynkhreh na ka bynta ban pynmih ïa ka ‘Portal’ na ka bynta ban ïoh pynrung kyrteng ïa ki nongwad kam ha ki kompeni jong ki riewshimet.
Ha ka por ba dang don ki jingïasuhbuit ha kaba ïadei bad ka jingthungkam ka bym long katkum ka aiñ ïa kaba la leh da ka sorkar Jharkhand ïa kaba la weng noh da ka Jharkhand High Court, ka sorkar jong u Hemant Soren ka la thmu ban pyntreikam da ka jingbhah kam kaba 75 per cent sha ki nongshong shnong ha ki kompeni kiba ha ka thaiñ ha une u snem 2023.
U Myntri ka tnat Labour u Satyanand Bhokta, ha ka por ba u la ai jubab ha kaba ïadei bad ka jingkylli ïa kaba la buh da ki MLA jong u ha State Assembly, u la pyntip ba ki rukom pyntreikam ha kaba ïadei bad kane shen kan sa treikam shen ha u snem thymmai.
Kumba la ïathuh la ong ba ïa ka Jharkhand State Employment of Local Candidates in Private Sector Bill, 2021 la pdiang na ka bynta ka jingpyntreikam ha u Nailur jong u snem ba la lah ha kaba hapoh kane, la mang kumba 75 per cent ka bhah na ka bynta ki nongshong shnong na ka bynta ka kam ha ryngkat ka tulop kaba man u bnai kaba long da T. 40,000 ha ki kompeni jong ki riewshimet bad la ong ba la pyntikna ban pyntreikam halor kane.
Kumba la long na kane ka aiñ la ong ba “ha ka por ba la don ka jingpyntreikam na ka bynta ki nongthep kam jong ka thaiñ la ong ba yn sa khmih bniah ïa ka jingdon jong ki ha ki kyrdan pule katkum ki distrik ba ki wan bad katkum ki kynhun jait bynriew ba ki wan”.
Shuh shuh kane kan sa pynbiang ruh hapoh ka kynhun ba la khlieh da u heh ophisar uba dei khmih kynthup u MLA jong ka thaiñ, u Deputy Development Commissioner (DDC) bad u Circle Officer (CO) na ka bynta ban khmih bniah ïa ka rukom thung kam bad an pynmih ïa ki hukum kiba bun na ka bynta ki nongthep kam katkum ka hok jong ki.
Kum shi bynta ban ai jubab halor ka jingkylli ba la buh da u MLA jong ka seng JMM u Sudivya Kumar Sonu bad u MLA jong ka seng Congress u Pradeep Yadav, u Myntri ka tnat Labour u la kular da kaba ong ba kane ka aiñ kan sa treikam ha une u snem mar ïa dep ban pynbiang ïa ka Portal, kaba la buh na ka bynta ka jingpynrung kyrteng ïa ki nongwad kam jong ki kompeni jong ki riewshimet ki ban treikam ha Jharkhand.
“Ka Portal kan sa biang, bad lah ban pyntreikam hadien ba la pynkhreh, yn sa pynbna paidbah ïa ka jinglah ban treikam jong ka lyngba ki kompeni kiba dei ban pynrung kyrteng halor kane,” la ong u Myntri.
Baroh ar u Yadav bad u Sonu ki la ong ba kane ka long ka lad ai jingmyntoi ïa ki samla wad kam hapoh ka jylla hynrei la buh jingmaham ruh ïa ka sorkar ba lada kam lah ban pyntreikam pyrkhing, ki nongshong shnong kin sa shem shitom ha kaba ïadei bad ka jingïohkam ïohjam hapoh kane ka skhim.
“Wat lada ka lad pyntreikam ka long kaba bha eh, ka sorkar jylla ka la dei ban pyntikna ba ïa kane ka jingpyntreikam la dei ban pyntreikam pyrkhing,” la ong u Pradeep Yadav.
Hashwa kane, u Myntri Rangbah jong ka jylla u Hemant Soren u la pynpaw ïa ka jinglah jong u ban pyntreikam ha kaba ïadei bad ki lad thung kam- thung-jam ha ka jylla.
U Soren u la ong ba une u la thmu ban pyntreikam bha hadien ba ka High Court ka la pyndam noh ïa kane ka rukom thung kam da ka sorkar jong u.
U Soren u la ong shuh shuh da kaba bynrap ba un sa buh jingmut ha kaba ïadei bad ka jingkhmih bniah ïa ka rta jong ki nongthep kam bad ban ai jingmyntoi ruh ïa ki samla kiba la nang la stad ban thungkam ha ki skul sorkar.
“Ka sorkar jylla ka la dep ban pynduna lypa ïa ka jingsiew ha kaba ïadei bad ka jingpyndap ïa ki phome na ka bynta ka Test ha ka eksam thung kam bad ka la buh jingeh naba kiba bun ki samla ka thaiñ kiba 100 per cent ki dei ki ban ïoh ïa ki kam jong kiba la pass ïa ki kyrdan hapoh ka klas 10,” la ong u Soren.
