Chandigarh, Lber:
Ki pulit jong ka Punjab ki dang pynlong ïa ka jingleit khynra sha man ki thliew ïing ha ka shnong Hoshiarpur hadien ba la ïoh jingtip ba u nongïalap niam ki Sikh bad u nongkyrshan ki nong Khalistan u Amritpal Singh bad u nongïarap jong u ïohba ki don bad rieh ha katei ka thaiñ.
Ka la don ka jingpyntreikam kaba jur bha jong ki pulit hapoh bad ha ki bynta ba marjan jong ka shnong Marnaian kaba don ha Hoshiarpur naba ki pulit ki la sdang ïa ka jingleit khynra ha ka miet jong ka sngi Ba-ar hadien ba la don ka jingsuba ba ki la ieh ïa ka kali jong ki ha katei ka shnong hadien ba ki la shah buddien ha ki pulit.
Ka Counterintel-ligence Wing jong ki pulit ka Punjab ha ka miet jong ka sngi Ba-ar ki la beh thong ïa katei ka kali na Phagwara hadien ba ki la suba ba la kit ïa u Amritpal bad ïa u nongïarap jong u, la ïathuh ka tyllong khubor kaba la wan na ki pulit.
Kumba la suba la ong ba la don kumba lai haduh saw ngut ki briew kiba la ieh ïa ka kali hajan ka Gurdwara Bhai Chanchal Singh kaba don ha ka shnong Marnaian bad phet na kane ka jaka, la ïathuh ka khubor kaba la wan na ki pulit.
Ïa ka jingleit kerkut bad ka jingleit thwet ïa kine ki briew la pynlong ha ka miet jong ka sngi Ba-ar hapoh bad ha sawdong ki bynta jong ka shnong, katba ha ki Checkpost la pynlong ïa ka jingkhmih bniah, la buh ruh ïa ki jingker ha ki bynta jong ki surok bad pynlong ïa ka jingkhmih bniah khnang ban ïohkem ïa kine kiba phet rieh na kti jong ki pulit.
Haduh ba la thoh ïa ka khubor ym pat lap ïa u Amritpal Singh naduh ba ki pulit ki la pynlong ka jingleit thwet bad buddien ïa u bad ïa ki dkhot nongkyrshan jong ka seng Khalistan ‘Waris Punjab De’ ha ka 18 tarik, Lber, la kumba lai taïew hadien ba ma u bad ki nongïarap jong u ki la leit ban tur sha ka jaka treikam jong ki pulit ka Ajnala kaba don hajan Amritsar na ka bynta ban khmih bniah ba kan ym don jingeh ei ei ha kaba ïadei bad ka jingpyllait ïa u briew uba la shahkem. U Amritpal u la lait phet na ka shrip jong ki pulit ha Jalandhar distrik ha ka 18 tarik, Lber, ha kaba u la kylliang ïa ki kali bad ruh ïa ki jingriam jong u khnang ban lait na ka jingshahkem ha ki pulit.
Ma u bad ki nongïarap jong u ki la shah pynngat halor kiba bun ki kyndon jong ka aiñ. Ka Video kaba thymmai kaba dang saphriang shen ha ki lad phah khubor ka la ong ba la ïohi ha ka sngi Ba-ar ba u Amritpal Singh ha ryngkat u nongïarap jong u u Papalpreet Singh ki la paw ba ki la ïadonlang bad ba u Amritpal u la ïaid khlem ka jaiñspong bad u la deng ruh da ka Mask.
Kane ka CCTV Footage, kumba ka paw la ong ba ka dei ha ka ïew ha Delhi, ha kaba la ïohi ba u Amritpal u la deng ruh da ki ïitkhmat ïong bad nadien jong u la bud u Papalpreet Singh ha kaba u la kit ruh kawei ka pla.
Na ka liang jong ki pulit kim pat lah ban ong ei ei halor ka Video kaba la saphriang bad kim pat lah ban pyntikna la ki dei ne em ki briew ïa kiba la shah thwet jur namar ka jingtohkit bad ka jingkhmih bniah halor kane ka dang ïai bteng.
Kumba ka long mynta ki pulit kim pat lah ban ong ha ka shnong aïu kine kiba la phet rieh na ki pulit ki don namar ba kim pat lah ban pyntikna na-mar ba ka jingleit thwet ïa ki ka dang ïai bteng haduh mynta.
