Udhampur, Lber:
Ka kynhun National Investigation Agency (NIA) ha ka sngi Palei ka la buh da ka jingujor ha kaba ïadei bad ka jingjia jong ka jingbthei bom ha Udhampur pyrshah ïa ki arngut ki lehnoh jong ka kynhun Lashkar-e-Taiba (LeT) terror, la ong ki heh ka kynhun tohkit. “Hadien ba la pynlong ïa ka jingtohkit kaba bniah ha kaba ïadei bad ka jingpynbthei bom IED kaba la jia ha Udhampur da ki lehnoh LeT lyngba ki kynhun lehnoh kiba na ka ri Pakistan, ka kynhun NIA ka la buh da ka jingmudui ejahar pyrshah ïa ki arngut ki lehnoh LeT,” la ong u nongaiktien jong ka kynhun pulit.
“U Mohammad Aslam Sheikh ba la tip ruh da ka kyrteng kum u Adil bad u Mohammad Amin Bhat ba la tip ruh da ka kyrteng kum u Abu Khubaib bad kum u Pinna ki la shah mudui halor ki kam pyntriem jong ki ban thmu pynkhie-im ïa ki kam pyntriem jong ki lehnoh ha Jammu da kaba pynrung dkhot ïa ki briew ba kin long ki nongïarap jong ka kynhun lehnoh bad ïa ki lehnoh kiba la pyndem wait bad ai mynsiem bad pynshlur ïa ki ba kin leh ïa ki kam pyntriem jong ki lehnoh,” u la bynrap.
Ka kynhun NIA ka la shimti ïa ka jingtohkit ha kaba ïadei bad ka jingjia ha ka 15 tarik, Naiwieng jong u snem ba la lah na kti jong ki pulit ka Jammu & Kashmir. Na ka jingpynlong ïa ka jingtohkit jong ka kynhun NIA la lap ba u Mohammad Aslam Sheikh u la ïatreilang bad u Mohammad Amin Bhat, uba long u lehnoh ba shimet jong ka kynhun LeT ïa uba la shah shah buh kyrteng ha ka sorkar India, ha kaba mynta u la trei na ka bynta ka seng na Pakistan. “U Pinna u la pynrung dkhot ïa u Adil na ka bynta ban pynbthei ïa ar tylli ki bom IED ha ka jaka sangeh bos kaba don ha ka jaka paidbah jong ka Udhampur distrik, ha kaba kane ka la pynmynsaw ïa arngut ki briew,” u la bynrap.
U Pinna hashwa u la long u nongshong shnong jong ka Doda distrik. “U la phet rieh sha Pakistan ha u snem 2009 bad mynta u la long u dkhot jong ka kynhun lehnoh LeT, uba la lah ban leh ïa ki kam pyntriem kum shi bynta ban pynkhie-im bad ban pyntyllun ïa ki rukom pyntreikam jong ka seng ha ka thaiñ Jammu,” u la ong. “U Adil u la leit lum ïa ki song ba la buh ïa ki tiar pynbthei ba la pynpoi da ka kynhun jong ki nongïarap jong u Pinna na ki bynta khappud ha Kathua Sector. U Pinna u la pyndonkam da ki Drone ha ka ban leit pynhap ïa kine ki tiar siat ba la thmu ban pynpoi sha kylleng ki jaka.
