Shillong, Naitung 12:
Ka hynmen jong ka Kong Sheba Mary Kharbani, Kong Isidory Kharbani kaba shong ba sah ha Mawlai Phudmuri ka la pynpaw ba ka para ka la mih na la ïing ha ka 10 baje mynstep jong ka 4 tarik mynta u bnai da kaba ïathuh ba kan leit trei kum ka nongpynkhuid ophis ha Umsawli (New Shillong).
Kum ban shu pynkynmaw ka Kong Sheba Mary Kharbani (40 snem ka rta) ka la khlad noh na kane ka pyrthei ha ryngkat ar ngut ki paralok shynrang kiba ïatreilang ha ka Institute of Science and Bio Resource (ISBR) ha kawei ka kamra kaba dang ïaid ka jingshna ïa kane ka jaka pule.
Nalor katei ka kynthei, ki ar ngut ki shynrang kiba la khlad ki long u nongap pahara Bah Backstar Kharkrang (30), bad uwei u para ba ïatreilang Bah Rupert Donbor Dohtdong, 43 snem ka rta baroh lai ngut ki dei kiba sah ha Mawlai Phudmuri.
La suba jur ba ka jingkhlad jong kitei lai ngut ka dei namar ki bam ïa u tit.
Ïa ka metïap jong kine lai ngut la lap ha ka Sngi U Blei. La suba ba ki la khlad na kane ka pyrthei ha ka miet jong ka Sngi Balang mynshem taïew.
Haba u nongthoh khubor u la ïoh ban buddien halor ka jingkhlad jong kitei lai ngut, la ïoh ban ïakren kyrpang bad ka Kong Isidory Kharbani kaba dei ka hynmen. Ka la ïathuh ba ka para jong ka (Kong Sheba Mary Kharbani) ka la mih na ïing ha ka por 10 baje mynstep jong ka Sngi Ba-ar mynshem taïew da kaba rah ki khiew ki pliang bad ki jaiñ ban leit sah sha Umsawli namar ka la pyntip ba la ïoh bylla shatei ka jaka.
“Hashwa ba kan mih na ïing, nga la ong ïa ka para ba kan da leh tip sngi bad sumar bha ïalade haba ka leit sah jngai na la ïing bad ka la leit lang bad ki paralok napoh ka shnong Phudmuri” ka la ong.
Ka la pynpaw ka jingkyndit haba la ïoh khubor ha ka Sngi U Blei ba ka para ka la khlad na kane ka pyrthei. Haba ki la poi ha ka por 8 baje janmiet sha katei ka jaka ba ki sah ka long shisha kaba kynjah bad lap ba ki la thiah la ka jong ka kamra.
Ka la ïathuh ba kito kiba leit lang ki lap ba ka ja kaba ki la dep shet kim pat bam namar la ithuh ba kim pat khat tang khyndiat na u khiew ba ki shet, katba ka jyntah ba shet ïa u tit ka don lang.
Ka la ïathuh ba uwei na kita kiba khlad la ïohi ba ka kti bad ka phone u la bat ha shkor bad la suba ba u la pyrshang ban phone briew, hynrei um tip briew shuh.
Ka Kong Isidory ka la pynpaw ba katei ka jaka ba ki sah ma ki ka long shisha kaba kynjah bad lada pyrta ym don ba ïohsngew ne ym don ba lah ban ïarap.
Shuh shuh ka la ïathuh ba ka para jong ka, ka dei kaba shu bylla namar ka sah lang bad ka ha kajuh ka ïing ha Mawlai Phudmuri, hynrei kam poi pyrkhat ba kane ka jingkhlad tang namar ba kan bam ïa uta u tit.
