Jowai, Nailar 07:
Ka Iooksi Youth Welfare bad ka Risingsun Mukhla ki la khur ïa ka jingjop ha ka lympung ïalehkai 3rd Division Football Tournament (3rd Adelbert Memorial Trophy) ba la pynïaid da ka West Jaiñtia District Sports Association (WJDSA).
Ha ka jingïakhun kaba la long ha madan Kiang Nangbah Stadium Ladthadlaboh, Jowai ha ka la Lah Sngi U Blei, ka Iooksi Youth Welfare ka la pynliem noh ïa ka Moodymmai da 3-1.
Ha kane ka jingïakhun ka Moodymmai ka la ïoh ban pynkhih jar nyngkong ha ka minit kaba 29 lyngba u Teimi Passah. Kham hadien shiteng kynta ka Iooksi Youth Welfare ka la lah ban pynïakhaid kylla lyngba u Pyrkhat Paslein ha ka minit kaba 36. Kane ka kynhun ka la pynbud sa ar kol lyngba u Ngaitmi Syngkon (56) bad Pyrshang Tangliang (62).
Haba phai sha kawei pat ka jingïakhun kaba bud, ka Risingsun Mukhla ka la jop da 5-0 kol ïa ka Mookynphad Mihmyntdu. U Melvin Lyngdoh u la ïoh ban thep ar kol ha ka minit kaba 17 & 39, katba ïa kiwei pat la pynbud da u Nathan Suna (61), u Pynyoo Bang (69) bad u Chembun Suna (70).
