Guwahati, Naiwieng:
U Syiem jong ka Bhutan, u Jigme Khesar Namgyel Wangchuck u la poi ha Guwahati, Assam hynnin ka sngi ka 3 tarik, Naiwieng na ka bynta ka jingleit jngoh kaba lai sngi sha ka jylla.
U Syiem jong ki nong Bhutan u la shah pdiang burom ha u Myntri Rangbah jong ka jylla u Himanta Biswa Sarma bad ha kiwei pat ki heh jong ka sorkar jylla bad jong ka sorkar kmie.
U Syiem lem bad ki nongbud jong u ki la poi ha ka jaka sangeh liengsuiñ ha ka Lokpriya Gopinath Bordoloi International (LGBI) Airport kaba don ha Guwahati, da ka liengsuiñ kaba kyrpang ka Druk Air Flight.
Ha kane ka jingleit jngoh kaba lai sngi, u Syiem Wangchuck un sa don bynta ha kiba bun ki prokram ha Guwahati bad un sa leit ruh ban jngoh ïa ka Kamakhya Temple bad ka Kaziranga National Park.
Ha ka step kaba bud, kata mynta ka sngi u la dei ban leit sha Jorhat na ka bynta ban leit jngoh ïa ka Kaziranga National Park. Kane ka jingleit jngoh jong u Syiem Wangchuck ïa ka Assam ka long shi bynta ban nang pynkhlaiñ shuh shuh ïa ka jingïadei jong ki, khamtam ha kaba ïadei bad ka jingwanrah ïa ki jingïasngewthuh jingmut halor ki bynta jong u pud u sam.
Ha u pud u sam uba don ka jingjrong kaba 265 kilometers jong u International Border, kine ki jaka ba marjan ki la wanrah ïa ka jinglong paralok kaba skhem da ki spah snem, lait noh tang hapdeng ka spah snem kaba 1990 bad ha u snem 2020 ba ki la mih ki kynrum-kynram, ha kaba hadien kane ka la don biang hapdeng ka jingïasngethuh jingmut.
Ha kaba ïadei bad ka jingthmu ban pynneh ïa ka jingïasngewthuh jingmut kine ki nongïalam ki la kut jingmut ban pynneh ïa ka bad ban ïakren halor kiba bun ki mat bad ban weng ïa ki jingeh baroh kiba lah ban ïakynduh hadien habud. Kumba ka long ha ka khana pateng ym pat ju don ka sakhi ban sah kynmaw ha kaba u Syiem jong ka Bhutan un leit jngoh sha Guwahati. Kane ka jingïohlad jong kine ki nongïalam ban ïakynduh ka long ka jingkyrmen ban lah ban nang pynkhlaiñ shuh shuh ïa ka jingïadei jong ki bad khamtam ha ki bynta khappud bad baroh kawei ka thaiñ.
