Shillong, Rymphang 02
Ha kawei ka jingjia, katkum ka jingtip ba la ïohlum na ki pulit, la ong ba ha ka jingleit jurip ban thew ïa u dewïong ba la kynnoh tih be-aiñ uba la don kumba 1,444 MT ha South Garo Hills, la lap pynban ba la don sa tang ki lyngkhot-lyngkhai jong u dewïong.
Ka khubor ka ïathuh ba ha ka 1 tarik Rymphang, u Mines Royalty Inspector na ka Gasuapara DMR Check Gate, Directorate of Minerals Resources, Meghalaya u la ujor ba ha ka 6 tarik Kyllalyngkot ha ka por kumba 10:55 mynstep, ki nongtrei ka DMR ryngkat bad ki pulit ki la pynlong ïa ka jingjurip ban ïoh thew ïa u dewïong ba la tih be-aiñ ha ka thaiñ Sawebri Abri.
Kane ka jingleit jurip ka long hadien ka jingïoh jingujor ba la ai ha ka 19 tarik Nohprah, 2023 da u Westonesing M Sangma. Katkum ka jingthoh ba la ai ha ka 19 tarik Nohprah, 2023 da u pulit ba dei peit ïa ka thanat Nongalbibra, la ong ba uta u dewïong u don haduh 1,444 MT. Hynrei ha ka por ba la leit jurip ïa uta u dewïong ha kata ka jaka, la lap sa tang ïa ki lyngkhot-lyngkhai jong une u mar poh khyndew.
Ka khubor na ki pulit ka la pyntip ba ha ka 1 tarik Rymphang ha ka por kumba 4 baje mynstep, ki runar ki la tuh ïa kawei ka thuk-thuk (ML-05U-3831) kaba dei jong u Donborlang Marboh na Jelly Shop, Nongthymmai, Shillong.
Ha kawei pat ka jingjia, u B Marbañiang u la ujor ba ha ka miet jong ka 30 tarik Kyllalyngkot, ki runar ki la tuh ïa ka thuk-thuk jong u (ML-05U-6867) kaba la pynïeng hajan ïing ha Umdabor, Lumjingsuk, Shillong.
Nalorkata, ki pulit ki la pyntip ba ha ka 1 tarik Rymphang, u Forest Range Officer, Williamnagar u la ai jingtip sha ki pulit ba kawei ka Tata Sumo (ML-08D-5840) ka la kit dieng. Kham hadien, ïa kane ka kali la lap na ka shnong Bawegre, West Garo Hills. Ha ka jingtohkit, ki pulit ki la lap ba la don ka jingplie ïa kawei ka karkhana ot dieng be-aiñ ïa kaba la kynnoh ba ka dei jong u Breznev LR Marak na Bawegre, bad la lap ruh ïa 48 tylli ki dieng sawdong. Na ka liang ki pulit ki la ai jingtip ïa kane sha ka tnat khlaw.
Sa ha kawei pat ka jingjia, u Santosh R Marak u la ujor ba ha ka 28 tarik Kyllalyngkot ha ka por kumba 10.30 mynmiet, kumba 7/8 ngut ki briew ki la ther maw ïa ka ïing jong u ha ka shnong Aruakgre, North Garo Hills, ki la pynjulor ïa ki dieng kwai, shuki bad ki la pyrshang ruh ban plie ïa ka jingkhang bah jong ka ïing sah. Na kine ki 7/8 ngut, u Santosh u la ong ba u ithuh khmat tang ïa kumba lai ngut bad kine ki dei na kajuh ka shnong ka thaw kaba u shong u sah.
Shuh shuh ha kawei pat ka jingjia, u Sengrak Marak, President, Federation of A’chik Freedom (FAF) u la ïoh bat ïa kawei ka kali (AS-34C-0646) kaba la kit dieng bad la aiti noh sha ki pulit ka Betasing ha South West Garo Hills.
