Shillong, Rymphang 02
Ka Khasi Students’ Union (KSU) lyngba ka Employment Monitoring Cell ha ka Sngi Thohdieng ka la leit ban ïakynduh ïa u Myntri ka tnad bording ka Jylla, u A.T. Mondal halor ka jingbym lah jong ka tnad MeECL ban khot ïa ka ‘Personal Interview’ na bynta ka kam ‘Assistant Engineer’ la palat saw snem mynta.
“Ha ka 11 tarik u Kyllalyngkot mynta u snem, ngi la phah dorkhas sha u Chairman-cum-Managing Director ka MeECL halor kawei ka kam na bynta ka kyrdan ‘Assistant Engineer’ ba la pyllait naduh ka snem 2019. Ïa kane ka kam la dep pynlong ïa ka eksamin bad ka kyrteng jong 24 ngut ki kyrtong ka la mih hynrei ki la pynsahkut noh ha ka ‘Personal Interview’,” la ong u Chairman ka Employment Monitoring Cell ka KSU, samla Reuben Najiar haba kren sha ki lad pathai khubor.
Halor katei, u samla Najiar u la ong ba ka seng ka la ïakynduh ruh ïa u Director ka MeECL bad ka jubab kaba u ai haba ïadei bad katei ka bynta ka long namar ka jingbym don pisa.
“Kumta halor kane, ngi la wanrah ka jingujor sha u Myntri ka tnad bording bad ngi la dawa ba kum ha kane ka kam, haba la don bad pyllait ïa ka jingmang naduh u snem 2019, balei pat ym lah ban thep ïa ka kam,” la buh jingkylli utei u nongïalam hadien ka jingïakynduh bad u Myntri.
U la kynnoh ruh ba ka jingslem halor ka jingbym lah ban pynlong ïa ka ‘Personal Interview’ ka pyni ba ka don eiei sha lyndet naba ka seng kam lah ban ngeit satia ba ka tnad kam don pisa.
“Ngi la pyni sha u Myntri ba ki don katto-katne, kumba ngi la ïohi ha ka kaiphod u Auditor General – ka MeECL ka la pynlut-phut ïa ka pisa lajong. Kum ha ka skhim ‘Saubhagya’ ha kaba T.150 klur tam ka la shu pynlut ïa kaei-kaei kaba ka lah ban pynduna. Don ki skhim kum ka UDAY ha kaba ka tnad ka la pynlut palat ban ïa kaei kaba ka donkam,” la ong u samla Najiar.
Haba dawa tohkit halor katei ka bynta, u la ong ba u Myntri u la pynsngew sha ki ba ka jingtohkit ka la don bad ka kam ka dang don hapoh ïingbishar.
Halor ka jingai daw ka MeECL bym don pisa, u Chairman u la ong, “Phim lah ban ai daw bym don pisa, man ka por kum ki paidbah ngi siew ïa ka bai bording bad balei ban duna kata ka pisa…hooid u Myntri u la pynshai ba ka jingpynmih bording ka duna hapoh Jylla bad kumta hap thied bording bad kumta ka jingduhnong.”
Ha kawei ka liang, u la buh jingkylli ba lada ka MeECL ka ong ba ym don pisa, kumne pat ka tnad ka pynlut pisa kai ha kiwei-kiwei ki kam – naba lah ban pyndonkam ïa kane ka pisa da kaba thung ïa ki kam ba donkam.
Shuh shuh u la bynrap ba u Myntri u dang shu tip mynta ka sngi halor ka jingbym lah ban khot ïa ka ‘Personal Interview’ mynta la palat saw snem bad kular ba ha ka Lah Sngi U Blei ban wan, un sa khot ïa ka jingïalang ba kyrkieh jong ka tnad bad khmih bniah ïa kane ka kam bad lada dang lah ban khot ïa ka ‘Personal Interview’, yn khot noh shi syndon ïa ka.
“Ngin dang ap ïa ka jubab jong u,” la ong u samla Najiar.
