Nongstoiñ, Risaw 22
Ar ngut ki samla ki la jah rngai naduh ka 17 tarik mynta u bnai bad ym shym la tip shano ki leit, hadien ba ki la mih na la ïing khlem da pyntip sha ki bahaïing-bahasem.
Na ka liang jong u Superintendent of Police ka West Khasi Hills u la pyntip paidbah ba ha ka 17 tarik u Risaw 2024, la ïoh ïa ka kaiphod ha kaba ïadei bad ka jingjah jong ar ngut ki briew, u Alman Nengminja (17 snem) bad u Ajay Dohphoh (18 snem), kiba la mih na ïing khlem da pyntip sha ki bahaïing-bahasem ha kaba haduh mynta ym shym la tip ïa ka jaka kaba ki don bad sah.
Katkum ka kyrwoh, u SP u la pynpaw ba halor kane ka jingjah jong kitei ar ngut la pyntip ruh sha baroh ki thanat ha kylleng ka Jylla Meghalaya bad ruh sha ki thanat jong kiwei-kiwei jylla ban ïarap wad ïa kitei ki briew kiba jah.
Shuh shuh la ong ruh ba ïa ka jingbatai shaphang baroh ar ngut ki briew lah ban ïoh ha ki thanat pulit jong ka thaiñ.
Ka kyrwoh khubor na u SP, ka ong ruh ba la kyntu ïa kino-kino kiba don jingtip ha kaba ïadei bad ka jaka sah jong ki, ba kin ïakynduh ïa ki pulit kiba jan tam.
Nangta, la ong ruh ba u Ajay Dohphoh, 18 snem ka rta, u don ka durkhmat rong lieh bad ka met kaba ksah, u don ki khmat kumba ju long bad u shñiuh rong ïong bad ka jingjrong jong u ka long 5 phut bad ïathuh ba la ïohi khatduh ïa u, ba u phong ïa ka T-shirt rong jyrngam bad ka patlun rong jyrngam, ryngkat bad ki slipar.
La ong ruh ba ka sur kren jong u ka long kaba jam, bad u don ki jingmlien ban dih kyiad bad dih duma bad u kren Garo, Lyngngam bad Hindi, bad u bud ïa ka niam Khristan.
Ka kyrwoh khubor ka ong ruh ba u Alman Nengminja, 17 snem ka rta pat u don ka durkhmat kaba lieh bad ka met ka phad kaba bit-biang bad kaba ksah, u shñiuh rong ïong, bad ka jingjrong kaba 5 phut bad la ïohi khatduh ïa u, ba u phong ïa ka T-shirt kaba lieh bad ka patlun jrong rong jngum ryngkat bad ki slipar. U don ka dur khmat kaba pyllun bad ka sur kren kaba jam bad ki jingmlien jong u ki kynthup ïa ka jingbam kwai/pan bad ka jingdih duma bad u kren Garo, Lyngngam bad Hindi, bad u long uba bud ïa ka niam Khristan.
