Shillong, Naiwieng 20
Ka kynhun ïalehkai ka Jylla ka la khur ia ka jingjop ha kaba sdang jong ka Group-E ha ka lympung ïalehkai 78th National Football Championship na ka bynta ka Santosh Trophy 2024-25, hadien ba ka la lah ban pynliem noh ïa ka Arunachal Pradesh da 4-3 kol ha ka sngi Balang ha Nalbari, Assam.
Kane ka nam jop ka la wan urlong lyngba u kapten ka kynhun u Fullmoon Mukhim u la thep ar kol bad ïa kiwei pat la thep da u Robert-son Malkovich Khong-riah bad u Overkindness L. Mawnai na ka bynta ban pynlong ïa ka Meghalaya hapoh ka jingïalam u Bah Hering Shangpliang ban khur ïa ki lai point.
Tang mar ïasdang ka jingïalehkai ka Meghalaya ka la ïakhun tyngeh ha kaba ka la ïoh ban pynkhih jar nyngkong eh lyngba u Overkindness ha ka minit kaba 8. Hynrei hadien katto katne por ka Arunachal ka la ïakhun ha kaba ka la lah ban pynphai kylla haduh ar kol hashwa ban kut ka jingïalehkai jong ka kylla step. Kane ka la wan urlong lyngba u Omang Dodum uba la thep ha ka minit kaba 15 bad u Tagru James ha ka minit kaba 45+1 na ka bynta ban tam da 2-1 kol.
Hadien katto katne por ba la bteng ïa ka jingïakhun jong ka kylla miet, ka Arunachal ka la thep biang ïa ka kol kaba lai lyngba u Tarh Dolu ha ka minit kab 61. Hadien ar minit ka Meghalaya ka la lah ban pynphai kylla lyngba u Fullmoon. Kane ka jinglah ban thep kol ka la pynlong ïa ka Meghalaya ban dangïoh mynsiem shuh shuh ha kaba ka la lah ban thep biang ïa ka kol kaba lai lyngba u Robertson ha ka minit kaba 65 na ka bynta ban ïakhaid mar 3-3 kol.
Hapdeng kane ka jingïakhun ka Meghalaya ka la ïai bteng ban ïakhun tyngeh bad hashwa ban kut ka jingïalehkai ka la lah ban thep ïa ka kol kaba khatduh lyngba u Fullmoon ha ka minit kaba 83 bad ban khur syndon ïa ka jingjop.
Lyngba kane ka jingjop ka Meghalaya ka dangdonkam ban trei shitom ha ki ar tylli ki jingïakhun ki ban kata pyrshah ïa ka Nagaland ha ka 22 tarik bad ïa ka Assam ha ka 24 tarik namar tang kawei ka kynhun ka ban ïoh rung sha ka wat kaba khatduh (final round) jong kane ka lympung.
