Shillong, Naiwieng 21
U Bah Kyrmen Shylla uba long u Nongïalam ka United Democratic Party (UDP) bad ha kajuh ka por u Myntri ka Sorkar Jylla u la pynpaw ïa ka jingsngewskhem ba ki paidbah jong ka Rilum Khasi bad Jaiñtia kin kyrshan ïa ka UDP ha ka ilekshon MDC sha KHADC bad JHADC, ka ban long ha u snem ban wan.
Haba kren bad ki nongthoh khubor dang ha kine ki sngi, u Bah Kyrmen u la ong ba ka UDP ka la pynkhreh shaid-shaid na ka bynta ka ilekshon MDC ka ban sa long.
“Ngi la shong jingïalang na ka por sha ka por hapoh ka seng. Ka seng ka la jam shakhmat. Ngi shu ap ïa ka por ban pynbna ïa ki kyrtong ha baroh ki District. Ïa mynta, ngi dang sdang ban pynkhreh ïalade. Kiba bun ki kyrtong ki la kyrpad ïa ngi ban ai tiket,” u la ong.
U Bah Kyrmen u la ong ba ha ka ilekshon MDC ba la dep, ki paidbah ka Rilum Khasi bad Jaiñtia ki la pynjop ïa ka UDP ha kiba bun tylli ki konstitwensi bad u don ka jingkyrmen skhem ba ha kane ka kynti ruh kin kyrshan kumjuh.
“Ha kane ka kynti ruh, ngi don ka jingkyrmen kaba skhem. Ngi la pyrshang katba ngi lah bad ngin sa pyni ruh ba ki briew jong ngi kin ïadon bad ngi bad nga kyrmen skhem ruh ba kin nym pynsngewsih ïa ki ha kane ka ilekshon ban wan,” la ong u Bah Kyrmen.
Une u Nongïalam ka UDP u la kubur ba ka seng ka la ïoh ïa ka jingsneng na ka ilekshon MP kaba dang shu dep bad ong “Ngi ngeit ba ki paidbah ki la don jingkyrmen bha ïa ka UDP bad khlem pep kin sa ïadonlang bad ngi”.
Haba kylli la ka jingwan ka VPP kan ktah ïa ka UDP ha ka ilekshon MDC? U Bah Kyrmen u la ong ba ym don jingkhang satia ïa kino-kino ki seng thymmai bad ki don ka hok ban ïakhun ïa ka ilekshon.
