Shillong, Naiwieng 22
Ki khynnah ïalehkai jong ka Meghalaya ki la ïeng rangbah shisha ban ïakhun naduh ka mynsiem ha ka lympung ïalehkai jong ka U-19 Men’s Cooch Behar Trophy Elite Group-A pyrshah ïa ka Delhi da kaba ki la ban pynneh ïa ka jingïakhun shaduh ka sngi basaw ha ka jing-ïakhun kaba la long ha madan ïalehkai kriket ka MCA ha Polo.
Haduh kaba kut jong ka sngi balai, ka Meghalaya kaba la wan tied ïa ka pali ba-ar, ka la ïoh 141 ron bad hap 5 wiket, bad ka duna sa kumba 222 ron kaba la wan hadien ba ka Delhi ka la ai ba kan khylliap noh ïa ka pali tied nyngkong ka jong ka hadien ba ka la lah ba kan kamai 623 ron hadien ba ka la hap noh 5 wiket.
Na ka liang ki nongtied ka Meghalaya, u Manthan Dey (34 ron) bad u Gaurav Narleng (30 ron) ki la lah ban kyrshan borbah ïa la ka kynhun tad haduh ba kin da lah ban ïalehkai haduh kaba kut jong ka por kaba la buh jong ka sngi balai.
Kum ban shu pynkynmaw, u Narleng ha ka pali ba nyngkong u la lah ban lamkhmat ïa ka Meghalaya hadien ba u ïoh 95 ron.
Ha kane ka jingïakhun, u Heiyomiki Ryngkhlem u la hap ban shong noh hapdeng ka jingïakhun hadien ba u la mynsaw noh ha ka por ba u dang wan ban tied bad kumno-re-kumno ka bol kaba la kawang da u Udhav Mohan ka la kum dei beit phlak ïa ka jingda khlieh (helmet) ka jong u. Kum ka lad ban ïada, la rai ban pynshong noh shwa ïa u bad khmih lynti lashai pat ka sngi un lah ban wan biang ban bteng ïa ka pali wan tied ka jong u.
Kumta tad haduh ba kut jong ka sngi, u Kshitij Singhania u dang ïai neh hapdeng ka madan ïakhun hadien ba u la lah ban ïoh 6 ron bad u Shavian Blah 14 ron. Kine ar ngut ki nongtied ka Meghalaya ki la pyndonkam hok ïa ka jinglong jong ka madan bad ha kajuh ka por ban ïeng ïakhun ïa ki nong-kawang bol ka Delhi bad kyrmen ba kine baroh ar ngut kin lah ban ïai bteng ïa kane ka bynta haduh ka sngi kaba bud.
Kum ban shu pynkynmaw biang, ka Delhi kaba la wan ban sdang ïa ka pali tied ka jong ka naduh hynnin ka sngi na ka 468 ron na ka bynta 2 wiket, ka la bteng ban bynrap shuh shuh sa 155 ron ha shwa ba kan rai khylliap noh ïa la ka pali.
Ha kane ka pali u nam tam napdeng kynhun ïalehkai ka Delhi ka la wan lyngba u khun jong uwei na ki snar ïalehkai kriket ba la shongthait ka ri, u Virender Sehwag u Aaryavir Sehwag uba la lah ban ïoh 200 ron bad ïai bteng ïa la ka jong ka pali ban ïoh shuh sa 297 ron ha shwa ba un shah pynkhyllem noh ha u Rudra Singh.
