Nongpoh, Nohprah 10
U Symbud Myntri Rangbah ka Jylla, Bah Prestone Tynsong ha ka Sngi Ba-ar u la buh mawnongrim na ka bynta ban sdang pyntrei noh shen ïa ka surok kaba pynïasoh na Nongpoh-Umden-Sonapur (NUS), kaba la pyndonkam da ki spah tylli ki shnong.
Kum ban shu kdew, kane ka surok ka dei kaba la jot rathai mynta da ki phew snem bad kaba la buh jingeh shikatdei ïa ki paidbah nongleit nongwan khamtam kito kiba ngat ha ka pang ka shitom bad donkam kyrkieh ban poi sha ki jaka ai jingsumar.
Ïa kane ka surok kaba pynïasoh na Nongpoh sha Umden ha ka jingjngai kaba 20 kilometer la mang tyngka lyngba ka State Plan ha ka jinglut kaba T.49.53 klur kum kata ka surok Intermediate Lane kaba don ïa ka jingïar kaba 5.5 meter, katba ïa ka ba sah pat na Umden sha Sonapur ha ka jingjngai kaba 38.6 kilometer la mang tyngka lyngba ka skhim PMGSY-III, Batch-I ha ka jinglut kaba T.47.20 klur.
Ha kane ka sngi la wan ban ïadon ryngkat naduh u Bah Mayralborn Syiem, MLA ka Nongpoh, u Dr. Celestine Lyngdoh, MLA ka Umsning, u Bah Balajied Rani, MDC ka Nongpoh, ki heh ophisar ka tnat PWD Roads bad Building ka jylla, ki bor pynïaid District ka Ri Bhoi nalor kiwei kiwei ki ‘riew rangbah bad ki paidbah nongshong shnong ka thaiñ.
Haba ai jingkren ha kane ka sngi, u Bah Prestone Tynsong u la ai khublei naduh ki MLA, MDC, ki heh ophisar ka tnat PWD bad ruh ïa ki paidbah kiba la wan ban ïadon ryngkat lang ha kane ka sngi sah jingkynmaw ban buh mawnongrim na ka bynta ban shna noh ïa ka surok NUS.
U Bah Prestone u la ïathuh ba ka Sorkar Jylla ka la shimkhia bha ïa kane ka kam bad ïathuh ba hapoh une u bnai Nohprah, yn pyndep lut ïa ki jingdonkam bad ha u bnai nyngkong jong u snem 2025, ka kam kan sdang noh shaid-shaid na ka bynta ban pynsuk bad ai jingmyntoi ïa ki paidbah kane ka thaiñ.
U la ïathuh ba ka Sorkar Jylla ka pynlut da ki phew hajar klur ha ka shisnem tang ban shna ïa ki surok bad jingkieng, da kaba pyntip ba palat spah tylli ki projek surok bad jingkieng ki la ïaid shakhmat ban pyntrei lyngba ka skhim PMGSY tang na ka bynta ka mang tyngka jong ka snem 2024-25 kiba ka jingjngai ka la jan kot sha ka 800 kilometer.
U Bah Prestone u la pyntip ruh tang ban shna bad pynbha ïa ki surok ha ka jylla baroh kawei, ka Sorkar lyngba ka State Plan ka la mang tyngka haduh T.1100 klur bad PMGSY ruh kumba T.1100 klur, ka CIRF kumba T.400 klur, na ka RIDF kumba T.130 klur bad na ka World Bank kumba T.2000 klur. Namar kata, u kyrmen skhem ba ha kine ar ne lai snem ki ban sa wan, ki paidbah kin sa ïohi ïa ki jingkylla, kata hadien ba la lah ban pyndep ïa kitei ki surok ha ki thaiñ bapher bapher jong ka jylla.
Katba u Bah Mayralborn Syiem u la pynpaw ïa ka jingsngewkmen hadien ka jingïai buddien bad kumba u Bah Prestone u la dep ban kular ha u snem ba la leit, kane ka surok mynta ka kynti ka la urlong kumba u la dep ban kular pynpaw ba kane ka dei ka sngi ka ban sah jingkynmaw ïa ki paidbah ka thaiñ bad ai ruh ka jingkhublei kaba kyrpang ïa u Symbud Myntri Rangbah ka jylla, ki heh ophisar ka tnat PWD Roads bad ïa ka Sorkar Jylla hi baroh kawei.
Katba u dang ai jingkren, u Bah Mayralborn da ka jingsngewlung mynsiem halor ka jingurlong kane ka surok kaba ki paidbah ki la angnud mynta da ki phew snem kynthih, brup u la jaw ummat bad pan map na u Bah Prestone ïoh lehse ki la don ki paidbah kane ka thaiñ kiba la kren beiñ, kren bitar bad pynmong ïa u Bah Prestone ha kine ki bnai bad ki snem kiba la leit noh na ka daw jong kane ka surok bad kyrpad ba um dei satia ban thew ban woh.
U Bah Mayralborn u la ïathuh ruh ba ki dang bun kum kine ki projek kiba dang wan hapoh ka thaiñ bad kyntu ïa ki paidbah ba ki dei ban ai ka mynsiem sngewnguh ïa ki briew kiba la leh bha bad ba ki bteng ban ai ïa ka jingïatreilang kaba pura khnang ba baroh kine ki jingangnud kin urlong bad khamtam ba ka jingpyntrei ïa kane ka surok kan ïaid beit ïaid ryntih khlem kano kano ka jingthut.
Ha kane ka sngi, na ka liang jong ki nongkren, ki la shim ruh ïa ka kabu ban ai khublei Khristmas bad Snem Thymmai ba suk ba kmen ïa ki paidbah nongshong shnong jong ka thaiñ bad ka jylla hi baroh kawei.
