Shillong, Nohprah 10
U Myntri ba khmih ïa ka tnat Public Health Engineering (PHE), u Marcuise N Marak u la ïathuh bad ong ba ka jingpyntreikam ïa ka skhim pynpoi um sha man ki thliew ïing, ka Jal Jeevan Mission (JJM) ka la kot sha ka 83.9 percent bad la buh thong ban pyndep ha u bnai Lber jong u snem ban wan.
U la ïathuh ka jingpyntreikam ïa kane ka skhim ka la jan dep lut baroh kumba ka long mynta, hynrei u la ong ba ki don ki jaka ba ïa kane ka projek ym pat shym la lah ban pyndep namar ka jingbym ïoh ïa ka No Objection Certificate (NOC) na ka tnat khlaw bad don ruh ki jaka ba ym pat shym lah ban sdang namar bym ïoh ïa ka jaka ban buh ïa ki top um, jaka pynkhuid ïa ka um.
Haba kylli, u la ong ba na ka liang ka tnat kan pyrshang katba lah ban pyndep noh ka jingpyntrei ïa kane ka skhim hapoh u Lber jong u snem ban wan.
Ha kaba ïadei bad ka thaiñ Garo Hills, u la ong ha ka thaiñ baroh kawei ka jingpyntrei ïa ka JJM ka ïaid stet bha, hynrei u la bynrap ruh ba ki don ki projek ba la shu iehnoh kumto da ki kontraktor. U la ong ba na ka liang ka tnat ka la ai da ka jingmaham kaba tyngeh ïa kum kita ki kontraktor.
“Don ki projek kiba ngi la knieh noh namar ka jingbym lah ban pyntrei da u kontraktor, mynta ngi la aiti sha kiwei pat kiba lah ban trei bad ka kam ka la ïaid”, u la ong.
U Marcuise u la ïathuh ruh ba ha ka jingjurip kaba dang shen sha Garo Hills, la lap ba ki don ki jingeh na ka jingbym ïoh jingbit ban mait ïa ki khlaw, bad ka jingeh kaba khraw ka long na ka jingtyrkhong ki tyllong um.
U la ïathuh ruh ba na ka liang ka tnat ka la pan jingïarap pisa ruh na ka Sorkar Jylla ban pynpoi um na kiwei pat ki tyllong um khnang ba ka projek kan neh bad ba ka kam kan ïaid kumba la khmih lynti.
Haba kylli shuh shuh halor ka jingpynslem ka tnat khlaw ban ai jingbit, u Myntri u la ong ba ki don ki kyndon kiba bun bad kiba shim por ban leh, bad bynrap ba na ka liang ka tnat PHE ka la tyrwa sha ka tnat khlaw ban shim ïa ki jaka bym don jingktah bad bym donkam ban pynkhyllem ïa ki dieng.
