Shillong, Nohprah 10
U Working President ka Khun Hynñiewtrep National Awakening Movement (KHNAM), Bah Thomas Passah u la ong ba ka KHNAM kam dei ka seng kaba mih tang shisien ha ka san snem hynrei kaba ju kren halor ki mat ki jura bapher-bapher bad kaba ïai trei na ka por sha ka por wat lada don ne ym don ilekshon hapoh ka Jylla.
“Ka lyer ka biang namar ka KHNAM kam dei ka seng kaba mih tang shisien ha ka san snem, hynrei kaba ju kren halor ki mat bapher-bapher bad kaba ju ïai trei na ka por sha ka por wat lada don ne ym don ilekshon,” ong u Bah Passah.
Haba kdew ba ka seng ka dei ka bym don pisa, une u nongïalam u la ong ba wat la ka seng ka mad ïa kane ka jingeh hynrei ha kawei pat ka liang ka long ka seng kaba don ïa ka jingkitkhlieh.
“Ka KHNAM ka wad ïa ka kynhun kaba khlaiñ – kaba don ïa kawei ka sur, kawei ka jingthmu bad kawei ka thong,” u la ong.
Haba pynkynmaw ba ka seng ka la pyllait ïa ka thup kyrteng banyngkong jong 8 ngut ki kyrtong ban ïa aireng ha ka ilekshon MDC sha ka KHADC, u Bah Passah u la ïathuh ba ka seng kan sa pyllait ïa ka thup kyrteng ba-ar hadien ka Khristmas.
Ha kajuh ka por, haba pynsngew ba ki don ki briew kiba angnud ban ïa aireng na ka KHNAM ha ka ilekshon ban wan sha ka JHADC, u Working President u la ong ba ka CEC jong ka seng kan sa shong pyrkhat shuwa halor kane ka bynta.
Haba kylli halor ka KHADC, u la ong, “Lada ngi ïoh ki kyrtong kiba biang, ngin pynïeng lut ha baroh ki konstitwensi. Ngin hap ban peit bniah bha shuwa ïa ki kyrtong.”
Shuh shuh u Bah Passah haba ban jur halor ka jingkhmih bniah haba ïadei bad ka jingai tiket ïa ki kyrtong, u la bynrap, kumba ka long, ym don aiñ kyntiap seng haba phai sha ki District Council.
“Ki seng heh ki lah ban thied noh ïa ki. Kumta ngi hap ban peit bniah bha shuwa ïa ki kyrtong. Ïa kine kiba ngi la dep ai tiket, ngi la da peit bniah bha bad ngi tikna ba kin ym kynthih shawei pat. Ngi wad jingtip ruh shaphang jong ki na ki konstitwensi jong ki,” u la ong.
