Shillong, Nohprah 10
Ki nongïalam jong ka seng Kur Warjri ha ka Lah Sngi U Blei ka 9 tarik Nohprah, 2024 ki la ïathuh ba ki da khan sani bad bishar bniah bin-pa-bin ïa ka kur kynthei kaba la ïoh tnga da kiwei pat ki jaidbynriew ki bym dei ki Khasi haba ka pynpaw ba ka kwah ban phai biang sha la ka jong ka tynrai.
Ha ka jingïakren bad ki lad pathai khubor ha Shillong Press Club, u Acting General Secretary jong ka Kur Warjri, Bah Tairos Sing Warjri bad u Bah Raphael Warjri ki la ïathuh ba ka seng Kur ka peitngor bha ïa kane ka bynta khnang ba kan ym don kano-kano ka jingpyndonkam bakla ïa ka kur-ka jait tang na ka bynta ka jingkhwan myntoi shimet jongno-re-jongno bad ban ïada ruh ïa ka jingtuh jait da kiwei pat ki jaidbynriew ki bym dei ki Khasi.
“Ki don katto-katne ki Kur jong ngi ruh ba hadien ba ki la kynduh ha ka shongkha bad ki briew kiba nabar, ki la shah tuh noh ïa ka jait-ka kur bad haduh kine ki sngi bad ki por kiba mynta, ki don kiba kwah ban wanphai biang sha ka Kur Warjri tangba na ka liang jong ngi, ngin hap ban da bishar bniah shwa thik-pa-thik khnang ba kan ym wanrah ïa ka jingbakla lane ka huri-hura hadien-habud”, ong u Bah Tairos Sing Warjri.
Shuh-shuh u Bah Tairos u la ong ba kiba bun ki shynrang napoh ka Kur ruh kiba poi ban leit shongkha bad kiwei ki jaidbynriew ki bym dei ki Khasi, ki kwah ban leh ïa ka Tangjait bad na ka liang ka Kur Warjri kam ju ailad pat ïa kitei ki shynrang ka Kur ba kin pynkylla ‘Warjri’ ïa kano-kano ka briew kaba ki poi ban shongkha.
“Ngi pyrkhat ïa kane khnang ba ka rukom ai jait da ka Kur kan long kaba ïaid beit-ïaid ryntih bad ba ngin pyni ba ka Seng Kur Warjri ka dei ka Kur kaba burom ïa ka riti-ka dustur ba la buh naduh ki longshwa-manshwa”, bynrap u Bah Tairos.
Na ka liang u Bah Raphael Warjri u la ong ba kum ka Kur kan ïai peitngor bha ha kaba ïadei bad kane ka bynta namar ki la bun bha ki nongshim kabu ha ka ban pyndonkam bakla ïa ka jait-ka khong.
“Ïa ki kynthei kiba leit shongkha khyllah ruh bad kiba poi ban leit ai jait sha kiwei, ngim ong ba ngim pdiang ïa ki hynrei ngi hap ban bishar la hato kata ka jingkwah jong phi ba phin ïaineh ha ka tynrai lajong ka dei kaba sngur mynsiem lane ka dei kaba shu kwah tang ban khwan myntoi”, bynrap u Bah Raphael Warjri.
