Katba dang kthong ïa ka kali kit dieng beaiñ, shah pynsangeh jubor ka kali pulit

Tura, Nohprah 10

Ka kali jong ki pulit katba ka dang kthong ïa kawei ka kali kit dieng beaiñ ka la shah khang lynti noh ha ka kynhun jong ki nongshong shnong bad shah pynjulor ruh kumjuh.

Katkum ka khubor kaba la ïoh lum la ong ba ha ka por kumba 11 baje mynstep, ki pulit jong ka thanat Rajabala kiba dang don ha lynti ban leit sha New Bhaitbari na Rajabala ban pynlong ka jingtohkit ha kaba ïadei bad ka mukotduma jong ka thanat Rajabala, bad katba ki dang don ha lynti, ki la ïohi ïa kawei ka kali (Mahindra Pickup) khlem u registration number, kaba la kit ïa ki dieng bah.

La ong ba na ka liang ki pulit ki la rah kti ïa u nongñiah ban sangeh ka kali, hynrei u nongñiah u la pynher pynban ïa ka kali na kane ka jaka, kaba la pynlong ruh ïa ki pulit ban kthong ïa kane ka kali. Hynrei ynda la poi ha ka shnong Phersakandi, la don ka kynhun jong ki nongshong shnong kiba la pynwit hapdeng surok bad pynsangeh jubor ïa ka kali pulit bad pyrshang ban pynjulor ïa ka, ha kaba ki la ïoh ban pynjulor ïa ki ïit shakhmat bad shadien bad ruh ki indicator ne ki signal light.

Ha kane ka jingjia, baroh ki pulit ki la shong khop beit hapoh kali ban pynthikna ïa ka jingshngaiñ, naba kine ki briew kiba la pynsangeh jubor ïa ka kali, ki dei kiba la rah ryngkat ki maw bad kiwei ki tiar.

Kumta namar kane, wat la ki la pyrshang, kim shym la lah ruh ban ïoh bat ïa katei ka kali kaba la phet bak na katei ka jaka ryngkat ki dieng ba la kit beaiñ.

Hadien katto-katne, la lah ban ithuh ïa ki katto-katne nongshong shnong bad la suba jur ba ki dei kiba donkti lang bad ki nongkhaïi dieng beaiñ.

Ha kaba ïadei bad kane, la dep ban pynrung mukotduma pyrshah ïa ki nongkhaïi dieng beaiñ bad ki nongshong shnong.