Kumba 50% la lah ban pyllait ïa ki longkmie na ka jingma ha ka por kha khyllung

Shillong, Nohprah 10

Ban kham pynbha ïa ka jingshakri ha ka liang ka jingsumar, kumba 100 ngut ki doktor na ka Jylla ki la shah hikai pyntbit na ka bynta ban sumar bad pyllait ïa ki longkmie kiba dang pun dang kha na ka jingma khamtam ha ka por kha khyllung.

Haba ïakren bad u Principal Secretary ka tnat ka koit ka khiah u Sampath Kumar u la ïathuh ba kane ka sienjam ka dei kaba la leh khnang ban ïakhun ïa ka jingma kaba ap ïa ki longkmie kiba dang pun dang kha khamtam eh ynda la dei ka por kha khyllung namar ki don bun tylli ki jingjia ha kaba ki longkmie ki duh noh ïa ka jingim.

Kine ki doktor ki shah hikai pyntbit ha Tamil Nadu ha ki jaka sumar kiba khlem donkam siew dor eiei lyngba ka jingïarap ka tnat koit ka khiah jong ka Sorkar Tamil Nadu.

“Ka long kaba kongsan haduh katta-katta ba ki longkmie ki ïoh ka jingsumar ha ka por ba dang pun ïa i khunlung bad kaba kham kongsan shuh shuh ka dei ka jingsumar ba kin lait na ka jingma ynda la dei ka por ban kha,” la ong u Sampath.

Ka Sorkar Jylla ka la shim ki sienjam kaba kynthup ïa ka Meghalaya Early Childhood Development Mission (MECDM) bad ka Chief Minister’s Safe Motherhood Scheme (CM-SMS) bad ka Measurable Outcomes for Transforming Health, Education, Social Welfare, and Rural Development (MOTHER) na ka bynta ban peitngor ïa ka jinglong-jingman ki longkmie ha kylleng ki shnong bad ka jingthmu ka long ban pynduna ïa ka jingkhlad ki longkmie ha ka por ba kha khyllung kumjuh ruh ïa ki khyllung kiba dang heh dang san.

Kine ki doktor kiba la shah pyntbit mynta ki don ha ki jaka sumar na ka bynta ban ai ka jingshakri khamtam eh ban ïakhun ïa ka jingduh ei ïa ki longkmie ha ka por kha khyllung kumjuh ruh ïa ki khyllung hadien ba la dep kha.

Kumba ka long mynta, ka Sorkar Jylla lyngba kine sienjam ka la lah ban pynhiar sha 50% ïa ka jingkhlad ki longkmie kiba dang pun dang kha.

Kane ka jingïatreilang bad ka tnat ka koit ka khiah jong ka Sorkar Tamil Nadu kan long ka jingmyntoi shibun eh ïa ka jylla ban kyntiew ïa ki lad jingsumar ha kane ka jylla.

Ha ki snem ba la leit bun ki longkmie bad ki khyllung ki la khlad namar khlem biang ki lad jingsumar naduh ba ki dang armet.