Nongstoiñ, Nohprah 10
Ka Nongstoiñ Block Congress Committee (NBCC) ha ka 10 tarik Nohprah 2024 ka la shim ïa ka rai ban phah ïa ka kyrteng jong u Babu G Ningstar Marthong kum u kyrtong MDC na ka Congress ban ïakhun na Nongstoiñ Konstitwensi.
U Bah Eric K Syntiew, President ka NBCC u la ong ba ïa kane ka rai la shim ha ka jingïalang jong ka NBCC kaba la long ha kane ka sngi ban jied ïa u kyrtong MDC na ka bynta ka ilekshon sha ka KHADC.
Shuh shuh u la ïathuh kumba ka long mynta na ka liang ka NBCC ka la ïoh tang kawei ka aplikeshon uba aplai ïa ka tiket. Kane ka aplikeshon ka dei kaba wan na u Babu G Ningstar Marthong bad kum ka ïing hi baroh kawei ka la mynjur bad phah ruh ïa kane sha ka District Congress Committee.
Ha katei ka sngi la sakhi ruh da ki District Observer jong ka Seng ba kynthup ïa u Bah Phailostar Thongni, DCC Vice President, ha ka jingdonlang ruh u Bah Bormanding Nonglang President DC bad kiwei kiwei ki nongkitkam jong ka Nongstoiñ Block Congress Committee.
