Shillong, Rymphang 17
U manager ka Celtic, Brendan Rodgers, u la kyntu ïa la ka kynhun ba kam dei ban shah rem ha ka jingleit ïakhun pyrshah ïa ka Bayern Munich ha ka Champions League ka ban long ha ka step jong ka Sngi Balang.
Ka Bayern ka la don ha ka thup ban ïoh rung sha ka pre-quarter final hadien ka jingjop da 2-1 ha Celtic Park ha ka Sngi Balang. Hapoh ka rukom ïalehkai ba thymmai jong ka Champions League mynta ka samoi, ka Celtic ka la don shabar na ka jingïalehkai group ha ka sien kaba nyngkong naduh u snem 2012-13 bad don ha ka kyrdan ba 21 jong ka miej kheiñ point. Hynrei ka jingkiew jong ki ka la wan wat hapdeng ka jingbym lah ban ïalehkai bha ha ka lympung ïalehkai ha Europe.
Ka jingïakhaid khlem da lah ban thep kol ha ka jingïakhun pyrshah ïa ka Atlanta bad ka Dinamo Zagreb la pynkut noh da ka jingshah rem ha ka Borussia Dortmund bad ka Aston Villa, ha kaba ka Celtic ka la shah thep haduh 11 kol bad ban thep pat lai kol.
Ka Bayern, kaba la jop hynriew sien ha ka Champions League, ka lah ban don jingeh ha ka jingïalehkai shabar ha kane ka lympung mynta ka aïom, ha kaba ka la shah rem lai sien na ki san sienïakhun, hynrei ka la lah ban ïalehkai bha ha la ïing.
Ka Bayern kam shym la shah rem satia ha Munich ha ka Champions League naduh u Ïaïong jong u snem 2021, ka jingïalehkai kaba 20 sien kynthup ïa ki jingïakhun pyrshah ïa ka Real Madrid bad ka Manchester City ha kaba ka la lah ban khur jingjop.
Hadien ka jingjop da 3-0 ha ka sngi Saitjaiñ ïa ka Dundee United kaba don ha ka kyrdan kaba lai, ka Celtic ka la kamai da 13 poiñ na ka bynta ban tam ia katei ka kynhun jong ka Scottish Premier League.
Ki jingïalehkai pyrshah ïa ki kynhun ba kynsai jong ka dewbah Europe ki la pynpaw pyrthei ïa ka jingïapher ha ka jinglong jingman jong ka kynhun u Rodgers kiba donkam ban khur jingjop khnang ban nangkiew shaphrang ha ka Champions League.
Ka jingshah rem ha ka Bayern ha ka sngi Balang ka dei kaba nyngkong eh jong ka Celtic ha ha ki 33 tylli ki jingïalehkai naduh u Nohprah jong u snem 2023, te kumta la khmih lynti ba kan lah ha ka ban ïalehkai bha ha kane ka jingïakhun.
“Ngi la kiew bha ha kane ka samoi ïalehkai namar ngi la lah ban ïalehkai bha. Nga kwah ba ngin pyni ïa ka kyrdan jong ngi ha baroh kawei ka jingïakop bad khamtam ha kane ka jingïakhun pyrshah ïa ka Munich,” la ong u Rodgers.
