Shillong, Rymphang 19
Ka lympung ïalehkai 4th District League T20 Cricket Tournament 2024 ba la pynïaid da ka East Khasi Hills Cricket Association ka la nangjam shaphrang ha kaba ka Cricket Lover’s, Cricket Smit, Sohra Combine, Laitkynsew CC, Pomshutia CC, Laitjem CC, Friend’s United bad ka Hurdles CC ki la jam sha ka quarter final.
Ha ka jingïakhun kaba la long ha ka Sngi Balang ha madan ïalehkai ha Sohra, ka Royal Rangers ka la pynliem noh ïa ka Mawryngkneng da 7 wiket. Ka Mawryngkneng kaba la kam trai ban tied nyngkong, ka la ïoh 101 run bad shah pynhap 10 wiket ha ki 14.4 over bad u Ruston Lamare u la ïoh 19 run na ki 9 bol. Katba u Balabianglang Buhphang u la shim 4 wiket ha ki 4 over.
Haba wan shimti ïa ka pali ba ar, ka Royal Rangers ka la lah ban kynjop sha ka thong da kaba ïoh 102 run bad shah pynhap 3 wiket ha ki 14 over. U Lamphang Khongsni u la tied 23 run na ki 25 bol. Katba u Moonlight War u la shim 2 wiket ha ki 4 over. Ïa ka nam ‘Player of the Match’ la ïohpdiang da u Balabianglang Buhphang.
Haba phai sha kawei pat ka jingïakhun ba ar, ka Laitkynsew CC ka la jop da 75 run ïa ka Thynroid CC. Ka Laitkynsew ka la shimti shwa ban tied nyngkong ha kaba ka la ïoh 170 run bad shah pynhap 5 wiket ha ki 20 over. U Mebanrikupar Malngiang u la khyrwit ïa ka shiteng spah kaba 59 run na ki 45 bol. Katba u Banrilang Kharbamon u la shim 2 wiket na ki 4 over.
Haba wan beh ïa ka thong ka Thynroid CC ka la ïoh tang 95 run bad shah pynhap 10 wiket ha ki 18.1 over. U Bankit Nongtraw u la tied 25 run na ki 19 bol. Katba u Mebanrikupar Malngiang u la shim 3 wiket ha ki 4 over. Ïa ka nam ‘Player of the Match’ la ïohpdiang da u Mebanrikupar Malngiang.
