Shillong, Naiwieng 06
Khyndiat sngi hadien ba u Zenith M Sangma, MLA barim ka Rangsakona u la leit phai biang sha ka sem jong ka Indian National Congress (INC), la mih bad don bun ki jingïakren ba ki MLA kiba la jop na ka All India Trinamool Congress ruh ki lah ban leit phai biang.
Ka daw ka long ba u Zenith u dei ruh u para trai jong u Myntri Rangbah barim Dr Mukul M Sangma, MLA ka AITC na Songsak bad Nongïalam ka Liang Pyrshah.
Hynrei halor ka jingphet u Zenith, u Dr Mukul u la ong ba um don jingtip eiei bad ka long kaba lyngngoh.
Na ka liang u Bah Charles Pyngrope, MLA ka AITC na Nongthymmai bad President ka seng u la ong, ba ka long kaba sngewdiaw ba ka Congress kam don MLA shuh ha ka ïingdorbar thawaiñ ka Jylla.
Halor ka jinglah ban ban phai biang sha ka Congress, u Bah Charles u la ong ba ka por kan sa batai la yn rung biang ne em bad ka shong haduh ka por ban leit sha ka ilekshon MLA 2028.
U Bah Charles u la ong ba ka Congress ka dei ka seng kaba la don lypa ha ka jylla bad ri hi baroh kawei, bad kumta ban kiew ka seng, donkam ba ki briew kin rung. Ngeit skhem ba ka jingrung jong u Zenith bad kiwei hadien habud ba kan long kawei ka bynta ba ka Congress kan kiew biang hapoh ka jylla, u la ong.
“Kumba ka long mynta ngi ïohi ba naduh ba ïoh jylla, kata naduh u snem 1972, ym pat ju don shisien ruh ba yn nym don ki MLA Congress hapoh ka ïingdorbar thawaiñ, kumta ka long ka jingsngewdiaw ba kat ka Congress kan nym don ki dkhot hapoh ka ïingdorbar,” u la ong.
“30 snem nga la don ha ka Congress, nga kmen shibun ba ki la don kiba rung, namar ha ka synshar khadar ngi donkam ïa ka liang synshar donkam ruh ïa ka liang pyrshah khnang ba ka jingsynshar khadar kan long kaba beit ryntih na ka bynta ka jylla,” la ong u Bah Charles.
Halor ka jingkylli, u Bah Charles u la ong, ka AITC ka la don bad wat ka don tang khyndiat ruh ka la don, kumta hap ban peit ka por bad ynda la dei ka por leit sha u paidbah, hap shim rai lang na uba bun balang, khamtam na ki nongïalam kiba la kyrshan borbah, bad hap ban peit ruh ïa ka jinglong jingman ka saiñ pyrthei bad hangta yn sa lah ban shim ïa ka rai.
