Shillong, Nohprah 22
U Bah AL.Hek u Nong-ïalam ka Meghalaya Bharatiya Janata Party (BJP) ha ka 22 tarik u Nohprah 2025, u la pynthikna ba ka Party kan ïakhun ha ka ilekshon MDC sha Garo Hills Autonomous District Council (GHADC) 2026.
Haba kren sha ki lad pathai khubor, u Bah AL.Hek u la ïathuh ba ka Party haduh mynta ka dang peit thuh ïa ki briew kiba wan pan Tiket ban ïakhun ha ka ilekshon MDC ha GHADC.
U Bah Hek u la kubur ruh ba ka BJP kam lah ban ïakhun na baroh 29 tylli ki Konstitwensi hynrei u la pynthikna ba kan pynïeng kyrtong na ki katto ki katne Konstitwensi bad ka don jingkyrmen ban jop ha kane ka ilekshon.
“Ïa mynta ngi dang peit thuh bad peitngor ïa ki briew kiba wan pan Tiket na ka BJP ban ïakhun ilekshon MDC ha GHADC bad hadien ba la bishar bniah ngin sa lah ban pynbna paidbah, mano kita ki kyrtong bad katno ngut ngin pynïeng kyrtong,” la ong u Bah Hek.
U Bah Hek u la pynthikna ba haduh mynta ka Party ka la ïoh pdiang bun ki kyrteng jong ki briew kiba kwah ban ïakhun na ka BJP.
Haba ïadei pat bad ka jingïatehlok bad ka National People’s Party (NPP) ha ka ilekshon MDC, u Nongïalam ka BJP u la ong “Hooid ngi kloi ban ïatreilang bad ka NPP namar ngi la don lang ha ka Sorkar MDA-I bad MDA-II, hynrei ngi hap ban peit shwa katno ngut ngin jop, lane katno ngut ka NPP ka jop ha ka MDC ilekshon ka ban wan”.
