Shillong, Lber 11
Ka Atletico Madrid ka la shim ïa ka kabu na ka daw ki jingbakla ka Tottenham Hotspur ha ka Champions League na ka bynta ban jop da 5-2 kol ha ka wat kaba nyngkong jong ka pre-quarter final ha ka sngi Balang.
Kane ka kynhun ïalehkai jong ka Premier League ka la shah thep haduh 4-0 kol tang hapoh 22 minit bad kine ki la wan na ki lai tylli ki jingbakla kiba la paw shynna, kynthup ïa ar tylli ki kol ba la leh da u rangapkol u Antonin Kinsky, kaba la pynlong ïa ka Atletico ban thep ïa kitei ki lai ha Metropolitano Stadium.
U Julian Alvarez u la ïoh ban thep ar kol na ka bynta katei ka kynhun jong u Diego Simeone, ryngkat u Marcos Llorente, Antoine Griezmann bad u Robin Le Normand kiba la ïoh ban thep mar shi kol na ka bynta katei ka kynhun kaba na Spain. Hynrei u Pedro Porro bad u Dominic Solanke ki la lah ban pynphai kylla ar kol na ka bynta ban pynlong ïa ka Tottenham ban mad Tottenhama ka jingshah rem kaba hynriew ha baroh ki lympung ïalehkai bad ka lah ban buh jingeh run na ka bynta ka wat kaba ar.
“Ka long kaba sngewsih ha kum kane ka lympung ïalehkai kaba heh namar kum kine ki jingbakla. Kumta ngi la dei hok ban shah thep kol ha kaba sdang jong kane ka jingïalehkai, ka la long kaba palat ïa ngi,” la ong u coach ba shipor jong ka Spurs, u Igor Tudor hadien ba la kut ka jingïalehkai.
U Tudor u la ong ba u wan sha kane ka jingïalehkai kum ka lad ban pyrshang bad ban wanrah ïa ka jingkylla hapoh ka kynhun namar ka thong jong ka klob ka long ban pyllait na ka jingshah pynhiar kyrdan na ka Premier League.
Ha kawei pat ka jingïalehkai, ka Bayern Munich ka dangsah sa tang shi jam ban pynthikna na ka bynta ban ïoh rung sha ka quarter-final hadien ba ka la pynliem noh ïa ka Atalanta da 6-1 kol bad ka don jingkyrmen ban khur jingjop ha kane ka lympung.
Tang ha ka minit kaba 12 ha ka jingïakhun kaba la long ha Bergamo, u Josip Stanisic u pynkhihjar nyngkong eh na ka bynta ka Bayern. Hadien kane ka kynhun ka la thep biang lyngba u rangïalehkai ba paw u Michael Olise bad kiwei pat ki kol kiba la thep da u Serge Gnabry, Nicolas Jackson bad u Jamal Musiala.
Ka Bayern kaba la shah rem tang shisien ha la ïing ha kane ka aïom bad ha ka sngi Balang ka la lah ban pynpaw ïa ka jingtbit ha kaba u Harry Kane bad u Jamal Musiala ki la sdang da kaba shah pynshongben. Hynrei ka Atalanta kam shym la lah ban shah ban jam shakhmat ha kane ka jingïalehkai.
“Kane ka dei ka jait jingïalehkai kaba ngi da kwah. Ngi la long ka kynhun ka don ha ka jingma ha kane ka jingïakhun,” la ong u Kompany ha ka Prime Video.
“Ngi don ïa ki sap bad ka kynhun kaba biang, kumta kam long kaba phylla haba ki rangïalehkai ki pyni ïa kane ka jingïakhun.”
Na ka bynta ka Atalanta kan long kaba eh ban wanphai da ka jingkhlaiñ bor ha ka wat kaba ar watla ka la jop ïa ka Borussia Dortmund bad rung sha ka pre-quarter final, bad ka jingkut ka jingïalehkai ha kane ka lympung ka lah ban pynkut noh ïa ka jingshim bynta ki kynhun na Italy sha ka Champions League na ka bynta kane ka samoi ïalehkai.
