Shillong, Lber 11
Ka Thynroit CC bad ka Marbisu CC ki la khur jingjop ha ka 5th District League T20 Cricket Tournament 2026 ba la pynïaid da ka East Khasi Hills Cricket Association ha ka sngi Balang ha madan Saitsohpen kaba ha Sohra.
Ha ka jingïakhun kaba nyngkong ka Marbisu ka la pynliem noh ïa ka Hurdles CC Mawsynram da 23 run. Ka Marbisu CC kaba la kam trai ban tied nyngkong ka la kamai 140 run bad shah pynhap 8 wiket ha ki 20 over. Haba wan beh ïa ka thong ka Hurdles CC ka la shah pynkhyllem baroh ki nongtied bad ban kamai tang 117 run ha ki 19 over.
Haba phai sha kawei pat ka jingïakhun kaba ar, ka Thynroit CC ka la jop da 6 wiket ïa ka Saitsohpen Veteran Legend. Ka Saitsohpen Veteran kaba la jied ban tied nyngkong ka la kamai 101 run bad shah pynkhyllem baroh ki nongtied ha ki 18.2 over. U Ivan Maxwell Basaïamoit top u la tied 24 run na ki 22 bol. Katba u Adilbert Shabong u la khur 4 wiket na ka bynta 9 run ha ki 4 over.
Haba wan shimti ïa ka pali kaba ar, ka Thynroit ka la lah ban kynjoh sha ka thong da kaba kamai 105 run bad shah pynhap 4 wiket ha ki 15.1 over. U Kerlang Nongrum u la tied 30 run na ki 30 bol. Katba u Nangteibhalang Hynñiewta u la khur 1 wiket na ka bynta 15 run ha ki 4 over. Ïa ka nam Player of the Match la khur da u Aleric Wanswet.
