Shillong, Lber 11
U MLA barim ka Mawlai u Bah PT Sawkmie ha ka sngi Ba-ar u la plie ïa ka Annual Sports 2026 jong ka Sacred Heart Girls’ Higher Secondary School, Mawlai ha madan Juniorate.
La pdiang burom ïa u Bah Sawkmie da ka Principal jong ka Sacred Heart Girls HSS, ka Sister Evelyne Joy Kympat, ryngkat bad ka Sister Iris Suchiang.
La sdang ïa kane ka lympung ïalehkai balai sngi da ka jingïakob ïaid march pass da ki phra tylli ki kynhun, kiba kynthup ïa ki house kum ka Red, Yellow, Green bad ka Blue ba la ïashim bynta da ki khynnah junior bad ki senior.
Haba ai jingkren kum u kongsan Bah PT Sawkmie u la ai khublei ïa ka skul lyngba ka Principal kiba la khot sngewbha ïa u ban don bynta ha kane ka lympung kaba la ju pynlong shisien shi snem. U la ai mynsiem ïa ki khynnah skul ba kin trei shitom ban ïoh ïa ka jingjop ha ka jingim jong ki bad u la kitbok ruh ïa ki nongïalehkai kiba ïashim bynta ha ki jingïakob bapher bapher.
