Shillong, Lber 11
Ka Cheanchi K Sangma ka la lah ban pynpaw ïa ka jingtbit na ka bynta ban khyrwit ïa ka shiteng spah run, hynrei ka Meghalaya ka la duna da 14 run ha ka jingïalehkai kaba khatduh jong ka U-23 Women’s One Day Trophy 2025-26 (plate group) jong ka BCCI pyrshah ïa ka Mizoram ha ka sngi Balang ha Chandigarh.
Da kaba beh ïa ka thong kaba 178, ka Cheanchi (not out) ka la lah ban ïalehkai bha da kaba ka la ïoh ban tied 60 run na ki 114 bol ha kaba la pynlong ïa ka Meghalaya ban kamai 163 run ha ki 49.2 over.
Ha ka jingshisha ka Meghalaya ka donkam ban khur jingjop na ka bynta ban jam sha ka wat kaba phainal jong kane ka lympung, hynrei ha kaba kut ka Mizoram ka la ïoh rung ryngkat bad ka Sikkim.
Ha kane ka jingïakhun, ka Meghalaya kaba la jop ïa ka kynting pisa, ka la jied ban kawang bol nyngkong. Ka Balarihun Dkhar (1/48 ha ki 10 over) ka la ïoh ban pynhap wiket ha ka over kaba nyngkong, hynrei ka Mizoram ka la wanphai da ka jingkhlaiñ bor na ka bynta ban kynjoh sha ki 67 run ha ka jingïatied lang ka Saii (50) bad ka Sawmtluangi (32). Hynrei ka Meghalaya ka la lah ban pynkhyllem noh ïa ki.
Ka Sara Dafica Kharbani (3/24) ka la long ka nongkawang bol kaba kynsai ryngkat ka Indariakor Kharwanñiang (2/42), Monica Singh (1/28) bad ka Cheanchi (1/35).
Haba wan shimti ïa ka pali kaba ar, ka Meghalaya ka la shah pynkhyllem ki wiket, hynrei ka Mansi Anand (11) bad ka Indariakor (14) ki la pyrshang ban ïalehkai bha. Hynrei watla ka Cheanchi ka la ïalehkai bha, hynrei ha kaba kut ka la duh noh ïa ki paralok ba ïatied lang.
