Thaw u Kalyan da ki kynhun ban kyrshan ïa ka elekshon Local Body

Vijayawada, Risaw:  U President ka Jana Sena Party (JSP) uba dei ruh u Symbud Myntri Rangbah ka jylla Andhra Pradesh u Pawan Kalyan u la thaw ïa ki Ad hoc committee ha ka kyrdan Parliamentary...

Vijayawada, Risaw: 

U President ka Jana Sena Party (JSP) uba dei ruh u Symbud Myntri Rangbah ka jylla Andhra Pradesh u Pawan Kalyan u la thaw ïa ki Ad hoc committee ha ka kyrdan Parliamentary Constituency ban pynkhlaiñ ïa ka seng bad ban pynkhreh na ka bynta ka elekshon Local Body ban wan ha ka Jylla.

Ki komiti kin lum ïa ki jingtip na ki kyrdan ba shapoh shaphang ka jingkhlaiñ jong ka seng jong ka seng, ka jingtreikam jong ki nongïalam bad ki Jana Sainik, ki jingjia ha ka saiñ hima sima ha ka thaiñ, ki mat ba ïadei bad ki  paidbah, ki kyrtong kiba lah ban ïakhun bad ka jingïatreilang hapdeng ki paralok ba ïatreilang.

Kum shi bynta jong kane ka jingtreikam, la thaw ïa ki komiti ha kylleng ki jaka jong ka Ïingdorbar Thawaiñ, kiba kynthup ïa ki bynta jong ka Ïingdorbar Thawaiñ ruh kumjuh.

Kawei pa kawei ka Parliamentary Committee kan don lai ngut ki nongïalam kiba ha ka kyrdan jong ka parliament bad lai ngut ki nongïalam na kawei pa kawei ka Assembly konstitwensi kaba hap hapoh ka jingpeit jong ka. Ka Executive Team, kaba la tip kum ka Nirvahana Dal, kan ïarap ïa ki komiti ha ki kam jongki.

Katkum ka jingong jong ka seng, kawei pa kawei ka komiti kan aiti ïa ka jingwad bniah jong ka sha ka Central Local Body elections Coordination Committee kaba don 5 ngut ki dkhot. Ka komiti pdeng kan bishar bniah ïa ki kaiphod bad kan aiti ïa ki jinglap ba la lum lang sha u Pawan Kalyan.

U president ka seng un peit hi dalade ïa ki komiti bad wadbniah ïa ki jingtip ba la lum na kylleng. La khmih lynti ruh ba un sa ïakynduh ïa ki dkhot jong kawei pa kawei ka komiti jong ka ïingdorbar shen ban ai jingbthah halor ka jingpynkhreh ïa ka elekshon bad ki kam sengbhalang. Ki Ad hoc Committee kin dang treikam haduh ban da pyndep ïa ka rukom jied ïa ki bor shnong.

Hynrei ïa ki konstitwensi Parliamentary jong ka Nellore, Chittoor, Kadapa, Kurnool bad Nandyal yn peit beit beit da u Pawan Kalyan lyngba ka kynhun kyrshan pdeng. Ha kine ki konstitwensi yn thung tang ka Nirvahana Dal. Ka Vijayawada parliamentary konstitwensi ka la shah weng noh na ka thup ba mynta jong ki komiti ba la thung.

Nalor kata, ka Jana Sena ka la rai ban thaw ïa saw tylli ki komiti pdeng ban pynsuk ïa ka jingïaid lynti jong ka elekshon, ka komiti pynïaid bad ïalam ïa ka elekshon, ka komiti pynïaid ïa ka jingïatreilang, ka komiti ïalap elekshon bad ka komiti pynïaid pisa. Ha kine ki taïew ba la dep, u Pawan Kalyan u la pynlong ïa ki jingïalang bishar bniah.