Khliehriat, Rymphang:
“Ka jingïehnoh kam jong katto katne ngut ki nongïalam ka seng (party) ka long ka jingkyrkhu ïa ka party,” ong ka kyrtong jong ka NPP na ka 5-Sutnga Saipung Constituency ka Kong Santa Mary Shylla.
Ha ka sngi lah sngi U Blei mynta ka taïew, ki nongïalam jong ka NPP East Jaiñtia Hills District bad Youth wing ba kynthup naduh ki president, General Secretary bad katto katne ki dohot ki la ïehnoh ïa ka jinglong dkhot hapoh ka seng NPP. Haba ïakren bad ki lad pathai khubor hadien ka jingïalang ba kyrkieh jong ka seng, ha ka sngi Ba-ar, ka Kong Santa Mary Shylla ka ong ba ki nongïalam jong ka District bad ka nongïalam jong ka Youth Wing ki la mih noh na ka seng na ka daw ka jong ka kum ka kyrtong ym na ka daw ka seng.
Ka la ong ba ka la leit ïakren bad ki bad ka la ïasyllok bad kitei ki nongïalam khnang ban ïoh ïa ka jingïatreilang hynrei kitei ki nongïalam ki leh jngai na ka bad ka seng. Ka la pynshai ruh ba kitei ki nongïalam kiba la ïeh noh kam kim ju don lang bad ka naduh ba ka sdang ka jingïaid lynti jong ka namar ki la don jingmut lypa ïa kiwei ki seng.
