Shillong, Rymphang:
Ha ka Sngi Ba-ar, ki la don palat 350 tam ki nongkyrshan na ki seng saiñ pyrthei bapher-bapher ban leit pynïasoh noh sha ka seng Congress ha North Shillong na bynta ban ai jingkyrshan kaba pura ïa u kyrtong ka seng u Bah JA Lyngdoh ha kane ka ilekshon MLA ka ban long ha ka 27 tarik mynta u bnai.
Ki nongkitkam bad nongkyrshan kiba la pynïasoh sha ka Congress ki kynthup kum na ka seng UDP, BJP, NPP bad TMC. Hadien ba pynïasoh ki la mih lang ryngkat ban synran ïa u kyrtong ka seng ha ka jingleit thep kyrteng haduh habar jong ka shlem treikam ka ophis Deputy Commissioner.
Ha kane ka sngi shwa ban mih leit thep kyrteng, u Bah J.A Lyngdoh hadien ba u la lum ïa ki nongkyrshan bad pdiang ruh ïa kiba wan thymmai, u la pynpaw ka jingkmen bad ong ba u don ka jingkyrmen ban poi sha ka thong jong ka jingjop lyngba ka jingwan ban kyrshan sa ki nongkyrshan jong kiwei ki seng kiba la pyni ka jingieit bad jingshaniah ha u.
Na ka liang ki nongkyrshan na kiwei ki seng kiba la wan kyrshan ïa u kyrtong ka Congress, ki la ong ba ka jingwan pynïasoh sha ka Congress ka long ban ai jingkyrshan ïa u Bah J.A Lyngdoh uba long u briew uba don ka mynsiem sngewrit.
U Bah Don Shylla uba dei uwei na ki nongkyrshan ba hakhmat ka UDP, uba la mih ban pynïasoh biang sha ka Congress u la ong, ka jingleit ban ai jingkyrshan ïa u Bah J.A Lyngdoh ka dei namar ba u long u briew ba sngewrit bad pariah bad ruh uba kloi ban bud ïa ki matti jong u (L) Bah Friday Lyngdoh bad u (L) WHD Syngkon.
U la ong ba ka jinglong jong u Bah Lyngdoh ka long kawei kaba khring ïa kiba bun ban kyrshan, u dei uba pariah, ba la shemphang bad u rangïalehkai ba la ih bha.
Haba kren pat sha ki lad pathai khubor hadien ba la dep ban thep kyrteng, u Bah JA Lyngdoh u la ong ba ha kane ka kynti kaba mynta ka Congress kan sa jop bun ngut ki MLA.
“Lada ngi wan ha ka bor ngin tohkit ïa ki kam bamsap, ngin peit ïa baroh ki kam pynroi. Ka Congress kan jop ym tang ha North Shillong, hynrei baroh kawei ka jylla,” la ong u Bah JA Lyngdoh.
“Ki paidbah ki la kmen palat ba nga la mih na ka BJP ban ïasoh bad ka Congress. Kumta nga ngeit skhem ba kumba 17 haduh 18 ngut ki MLA ka Congress kan jop. Ngin thaw ïa ka Sorkar namar ki paidbah ki la ngiah ïa ka Sorkar MDA,” u la ong.
