Dimapur, Rymphang:
Shi sngi hashwa ka jingkut jong ka jingpdiang ïa ki kyrteng ban ïakhun ïa ka ilekshon sha ka Ïing Dorbar Thaw Aiñ, u Myntri Rangbah ka jylla Nagaland – Neiphiu Rio, u Symbud Myntri Rangbah – Y Patton, u Myntri Rangbah barim jong ka jylla – TR Zeliang bad kiwei kiwei ki kynrem ki lyndan ki la leit ban pynrung kyrteng na ka bynta ban ïakhun ïa ka ilekhson ka ban sa pynlong ha ka 27 tarik mynta u bnai.
U Rio, u ba dei u kyrtong jong ka seng Nationalist Democratic Progressive Party (NDPP) na ka thaiñ Northern Angami-II constituency, u la leit ban thep kyrteng ha ka shlem treikam jong u additional deputy commissioner ka thaiñ Chiephobozou, katba u Patton pat u ba dei u kyrtong jong ka seng BJP na ka thaiñ Tyui constituency, u la leit ban thep kyrteng ha ka shlem treikam u returning officer ka Tyui assembly constituency. Ïa u Patton la leit ban synran lem da u Myntri ka Sorkar Pdeng – Arjun Munda. Na ka liang u Zeliang, kyrtong ka seng NDPP na ka thaiñ Peren constituency, u la leit ban thep kyrteng ha ka shlem treikam jong u DC ka thaiñ Peren.
Haba ïakren bad ki lad pathai khubor hadien ba la dep thep kyrteng, na ka liang u Rio u la pynpaw ïa ka jingkyrmen kaba khraw ba ka NDPP-BJP sa shisien kan sa ïoh ban thaw ïa ka sorkar synrop ha ka jylla Nagaland. U la ong shuh shuh ba na ka liang jong u, um shym la ïohi satia ba kan don kano kano ka jingïakhun kaba jwat na kiwei kiwei ki seng saiñ pyrthei.
Ha ka jingïakren bad ki lad pathai khubor, na ka liang u Rio u la pyntip ruh ba u Myntri Rangbahduh jong ka ri India – Narendra Modi bad u Myntri ka tnat Kam Pohïing – amit shah kin sa wan ban jngoh biang sa shisien ïa ka jylla Nagaland ha kane ka taïew kaba mynta lane ha ka taiew ka ban sa wan.
