London, Rymphang :
Uwei na ki khlur iakura ka ri Bilat uba long ruh u lahduh barim ka World Heavyweight u Anthony Joshua, u iathuh ba mynta u lah pynkhreh bha ialade na ka bynta ban iatynjuh bor bad u rangiakura ba paw ka ri America u Jermaine Franklin ha ka 1 tarik u Iaiong ha ka jylli iakura kaba ha London’s O2 Arena.
Kumta ka khubor ka iathuh ruh ba u Joshua u lah wanphai biang mynta sha ka jylli iakura hadien ba mad arsien ka jingshah pynrem ha u Oleksandr Usyk, ha kaba u tei u rangiakura ba paw ka ri Bilat u dang shu shah pynrem shen hakhmat utei u rangiakura na Ukraine dang ha u bnai Nailar jong u snem ba lah dep ha Saudi Arabia. U Anthony un shim ia ka bynta na ka bynta ban iakura pyrshah bad u Franklin ha ka jingwad-lad wad-lynti ka jong u na ka bynta ban khur ia ka jingjop ba nyngkong naduh ba u lah pynliem noh ia u Kubrat Pulev ha u 2020. Ha shuwa katei ka jingpynbna paidbah da u Anthony, u Tyson Fury uba dang iai bat kum u lahduh ka WBC u lah dep ban iakren bad ka ktem jinghikai jong u Joshua halor ka rynsan iakura hapdeng jong ki ia kaba la tip kum ka ‘All-British Bout’ hynrei ka jingiakren halor katei ka bynta kam shym la poi shano shano ruh bad ha kaba lah ieh mynta ia u Franklin kum u rangiakura ba nyngkong ha ka jingwanphai biang jong u Anthony Joshua sha ka kam ialehkai.
Ha u bnai Naiwieng u Joshua u lah don shabar jong ka jylli iakura ha ka por ba u Franklin u lah mad ia ka jingshah pynrem noh ha u Dillian Whyte ha Wembley Arena; kaba long ruh ka jingshah pynrem kaba nyngkongeh na ka bynta utei u rangiakura ka ri Amerika uba lah pyntyllun ia ka kam ialehkai jong u lah 22 snem mynta.
Kumjuh ruh ka jingshah rem kaba lai ha ka jingim ialehkai jong u Joshua kam shym la long satia ka jingpynhap pyrda noh ia ka kam ialehkai ka jong u; pynban un wanphai sha ka kam ialehkai ha ha ka jylli iakura kaba ha London na ka bynta ka sien kaba nyngkong biang mynta naduh u snem 2016.
