Gaziantep, Rymphang:
Ha kane ka khubor la ong ba kiba bun ki paidbah nongshong shnong jong ka Turkey bad Syria ha kane ka kynti, ki la shu shong hapdeng ka jingsyier bad ka jingbym sngew shngaiñ namar kim lah ban tip la utei u jumai u la kut ne un dang wan biang kumba long ha kine ki 2 sngi ba la leit. Ha kajuh ka por ruh la ong ba kito kiba dang lait im, ki la shu ap sa tang ia ka khubor ban pynbna iap ia kito ki bahaiing- hasem jongki kiba la jah bad sakma namar ym i-don jingkyrmen shuh ba kin dang iakynduh biang badki lane ba kin dang lait im na katei ka jingjia.
La ong ba ha ka Lah Sngi U Blei, u jumai uba jur haduh 7.8 Magnitude u la pyn khñiuh ia ka Turkey bad Syria ha kaba ki don palat 8 hajar ngut kiba la ngat bad khlad ha katei ka jingjia bad bun hajar ruh kiba la mynsaw namar ka jingjulor bad jingkhyllem jong ki ïingmala bad ki jingtei bapher hapdeng ka jingkhñiuh jong u jumai ha katei ka por.
Kumta ruh la ong ba kawei ka samla kaba la lait im na katei ka jingjia ha Turkey, haba ïakren bad ki lad pathai khubor, ka la ong ba ka sngew kumba ki ummat ruh ki la lut bad kam nang shuh ban iam, namar watla ka la pyrshang ban wad bad ap khmih lynti ia ki bahaiing- hasem bad ki baieid- bathoiñ jongka, hynrei kam shym la iohi syrngiew eiei shuh ia ki bad kumta ruh ka la ong ba imat ka la hap ban shu ap noh sa tang ia ka jingpynbna ba kim don shuh, khnang ba kan suk ka mynsiem bad kan ym peit khmih lynti shuh ia ka jingwan phai jongki.
Shuh shuh ruh ka la iathuh ba hapdeng katei ka lanot kaba khraw ba ki paidbah ki mad ha katei ka thaiñ, pynban ym shym la don mano mano ruh ban wan poi ne ban wan iarap na ka liang ki tnat iarap lane ki ‘Rescue Team’ bad ka jingwan poi jongki ka long hadien kumba 12 kynta ba utei u jumai u la dep wan bad baroh ki ïingmala bad ki jingtei ki la dep khyllem lut bad ha kajuh ka por ruh baroh kito kiba dang sah mynsiem ruh ki la shu kdut mynsiem ei noh namar ka jingslem palat jong ki tnat iarap ban leit poi sha katei ka jaka.
Namarkata ruh la ong ba ki nongshong shnong bad ki pulit jong katei ka thaiñ hi kim banse ban pynkhuid hi noh ia ki kynrum- kynram bad ban khyllie hi ia ki metïap jong ki bahaïing- hasem lade namar ka jingslem jong ki tnat iarap ban leit poi bad ban ai jingïarap.
Shuh shuh ruh la ong ba ynda kitei ki briew jong ka kynhun iarap ki la wan poi ha katei ka miet Lah Sngi U Blei, ki shu trei bad pynkhuid tang malu- mala bad tang kumba katto katne kynta hynrei ki la shongthait noh namar ki la poi miet bad ki hap ban sangeh noh namar jong ka jingdum synñia.
