Miao, Rymphang:
Ki bor sorkar jong ka jylla Arunachal Pradesh ha ka 10 tarik mynta u bnai ki la ïathuh ba hadien 8 snem, la lah ban ïohi biang sa shisien ïa uwei u khla ha Namdapha National Park & Tiger Reserve, Changlang district.
Kat kum ki jingïoh lum khubor la ïathuh ba ka kynhun ki nongwad bniah kiba trei hapoh ka tnat environment, forest & climate change ki la leit ban pynap da ki kor shon dur ha katei ka park hadien ka jingshem ïa ki dienjat jong u khla; bad dei tad haduh ka Sngi Balang kaba la dep ba katei ka kynhun ka la leit ban jurip ïa ki kor shon dur bad shem ba ki la ïoh ban ring dur ïa uwei u khla u ba la kham ïaw ka rta.
Katei ka kynhun wad bniah kaba kynthup ïa u Research Officer Tajum Yomcha, field biologist Mayur Variya, camera technician Atum Rumdo bad kiwei kiwei ki nongtrei ka tnat khlaw ki la leit ban pynap ïa ki kor shondur ha ka taiew kaba nyngkong jong une u bnai ba mynta.
Dei ha ka 31 tarik u Kyllalyngkot, hadien ka jingïoh jingtip jong ka jingdon ki dienjat khla ha ka thaiñ 17th Mile, Deban, ba katei ka kynhun la la leit ban pynlong da ka sorjamin na ka thaiñ 17th Mile tad haduh ka thaiñ 20th Mile. Kat kum ka jingïathuh jong u Field Director ka Namdapha National Park & Tiger Reserve – Aduk Paron u la pyntip ba ka kynhun ka la leit ban pynap 10 tylli ki kor shon dur ha ki khlaw kiba don ha ka thaiñ Deban bad dei tad haduh ka sngi Balang ba la dep ba ka kynhun ka la ïoh ïa ka khubor kaba bha. Na ka liang u Aduk Paron u la ïathuh ruh ba ka sien kaba khatduh eh ba la ïohi ïa u khla ha katei ka park ka dei ha u 2015.
