Ankara, Rymphang:
Ha kane ka khubor la ong ba ki don palat 23,700 ngut ki briew kiba la khlad na u jumai bah ha Turkey bad Syria, katba ka jingdon kiba khlad ka la nang kiew kumba la iohi ia ka kaiphod ba la ioh lum tad haduh jong ka step Sngi Saitjaiñ. Hynrei watla katta, la khmih lynti ban dang lap shuh shuh ruh ia kiba dang lait im bad kiba dang don jingim katba ki tnat iarap ki dang khyllie ia ki bynta ba twa bad julor jong ki ïingmala bad ki jingtei bapher ha kitei ki ri bad ban ioh pyllait im ruh ia kito kiba dang lait im bad sahkut hapoh ki jingtwa jong iing ki sem ha utei u jumai.
Kumjuh ruh u heh ka World Health Organisation (WHO) ha katei ka sngi u la pyntip ba u dang don ha lynti ban leit jurip sha Syria, katba ki tnat iarap ki dang ialeh ban wad hapdeng ka jingkhriat kaba jur ban lap ia kiba dang lait-im na utei u jumai bad kiba dang sahkut ha kino kino ki bynta ba rieh bad ba kah jong ki jingtwa ha ki thaiñ ba shah ktah ha u jumai.
Kumjuh ruh ki bahaiing- hasem jong kito kiba khlad ha utei u jumai, ki dang leit ban shimti ia kitei ki metïap na ki jakasumar ba la pynkit ia ki ha ka por ba ioh sei na ki bynta ba pher jong ka nongbah Antakya kaba don sha ka phang South jong ka Turkey.
Ha kajuh ka por ruh la ong ba katba ki tnat iarap ki dang ialeh ban wad ia kito kiba ngat ha katei ka jingjia, ki bahaiing- hasem jong kito kiba dang jah rngai kim shym don jingkyrmen shuh ban dang iakynduh biang bad ki baieid- bathoiñ jongki ha kane ka jingim namar ki sngi ki la iaid bad ka la tam ruh ia ka 72 kynta ba la buh, ha kaba ki stad saïan bad ki doktor ki la buh por ba dang lah ban pyllait im ia kito kiba dang sah mynsiem hapoh jong ka 72 kynta lada ioh ban sei bad rah noh ia ki sha jaka sumar.
La ong ba utei u jumai uba 7.8 Magnitude u la leit khñiuh ha kitei ki 2 tylli ki ri ha ka Lah Sngi U Blei, katba ki briew ki dang iohthiah lyngngai hapdeng ka jingkyn-oi jong ka miet. Bad kane ka la leit jia ruh ha katei ka thaiñ jong ka Syria ha kaba ki briew ba bun ki dang mad jingeh bha naduh ba khie ka thma poh iing hapoh Syria ha kaba kiba bun ki paidbah ki la shu iap bad sakma na ki bahaiing- hasem jongki.
