Guwahati, Rymphang:
U Director General of Police jong ka jylla Assam, u GP Singh ha ki khyndiat sngi kiba la leit noh u la pyntip ba ha ki 30 snem shiteng kiba la leit noh ki la don haduh kumba 8,000 ngut ki nongshong shnong jong ka jylla kiba la duh ei ïa la ki jong ki mynsiem na ki kam beaiñ bapher bapher jong ki seng kieng atiar ka jylla.
Ïa katei, u DGP u la pyntip paidbah ha ka por ba u la leit ban ïashim bynta bad ai jingkren ha ka rynsan Y20 Summit kaba la pynlong hajan ka nongbah Guwahati.
Ha ka jingai jingkren jong u DGP, u la ïathuh ruh ba ka jinglong jingman jong ki katto katne tylli ki jaka ha ka jylla Assam ka la wanrah ïa ka jingthrang jong ki nongshong shnong jong kitei ki thaiñ ban leit pynïasoh ne ïadon bynta bad ki seng kieng atiar. U la ïathuh ba na ka liang ka sorkar jylla ha kitei ki 30 snem kiba la leit noh ka la shim ïa ki sienjam bad ïa ki lad ki lynti kiba kyrpang ban pynsngew pynsngap ïa ka jingthrang jong ki paidbah nongshong shnong khnang ba yn lah ban tehlakam bad rat dyngkhong ïa ki kam beaiñ jong ki seng kieng atiar. U la ïathuh ruh ba dei tad ynda ki paidbah nongshong shnong kin sngewthuh ba ki dei shi bynta ha ka imlang sahlang, ba ka jingsuk jingsaiñ kan sa lah ban wan phai ha ka jylla Assam.
U DGP u la pyntip ba na ka jinglah jong ka sorkar jylla ban shim ïa ki sienjam kiba kyrpang, ka jingsuk ka la sdang ban wanphai biang bad ka la pynlong ruh ïa ka Sorkar Pdeng ba kan weng noh ïa ka jingpyntrei kam ïa ka aiñ Armed Forces Special Powers Act (AFSPA) na kiba bun tylli ki bynta jong ka jylla Assam. U la ïathuh ba tad haduh kane ka kynti kaba mynta, ïa ka AFSPA la pyntreikam tang ha kumba 27-28% ki jaka ha Assam. U la ïathuh ruh ba ki kam kieng atiar ki la sdang ban jah rngai na ka jylla Assam lait noh tang ha ki katto katne tylli ki jaka kiba don ha ka thaiñ mihngi jong ka jylla Assam.
Ha ka jingai jingkren jong u Additional DGP ka jylla Assam – Hiren Chandra Nath ha katei kajuh hi ka rynsan u la ong ba bun na ki khynnah samla ki la leit ban pynïasoh ïalade bad ki seng kieng atiar na ki daw jong ka jingtlot ha ka bor pyrkhat pyrdaiñ. U la ong ba ki samla ki la leit ban pynïasoh bad ki seng kieng atiar namar ka jingmad jong ki ïa ka jingshah kheiñ beiñ ha ka imlang sahlang, ka jingshah ieh marwei, ka jingbym biang ki kam ki jam bad na kiwei kiwei ki daw.
