Shillong, Rymphang 13:
U kyrtong ka TMC na South Tura, u Richard M. Marak ha ka Lah Sngi U Blei u la ther tyngeh ïa u Myntri Rangbah ka Jylla, u Conrad K. Sangma halor ka jingbym larkam ka synshar-khadar bad ka jingpynsaphriang ïa ki jingtip ba bakla.
Haba kynthoh ïa u Myntri Rangbah haba ïadei bad ka jinglum thup ïa ki kam ba la leh da ka Sorkar MDA hapoh ka jingïalam ka NPP ha kine ki 5 snem ba la dep, utei u kyrtong ka TMC u la buh jingkylli, “Kumno u Myntri Rangbah u nud ban ong ba lyngba ka skhim Jal Jeevan Mission, la pynïasoh palat 2.5 lak tylli ki longïing da ki ‘pipe’ um na ka 4000 ha u 2018?”
“Ka jingshisha ka long ba ka Sorkar NPP ka ïeng ha ka nongrim ka bym skhem hapdeng ki jingkynnoh ki bym shisha haba ïadei bad ka jingpyntreikam ïa ka JJM. Kum ban shu kdew hangne, ha u snem ba la dep, ha ka shnong Rongjeng Imamsdrop, ki nongshong shnong ym tang ba ki la shah lute na ka umbam-umdih, hynrei u Sordar ka Imsamdrop u la kynnoh ruh ïa ka tnad PHE halor ka jingshukor ïa ki ban ngeit ba la pyndep ïa ka projek. Kiba bun ki longïing ha South Tura ki la duh noh ïa ka hok ban ïoh umbam-umdih,” ong u Marak haba thad madan ïa ki jingkam ba lamler ka Sorkar MDA hapoh ka jingïalam u Conrad Sangma.
Haba kyntait ïa ki jingkam ba khlem nongrim jong u Myntri Rangbah uba la ong ba u la pyntikna ïa ka shong suk shong shngaiñ hapoh ka Jylla, utei u kyrtong ka South Tura u la ong, “U Myntri Rangbah u la rah ïa ki jingkam ba bakla jong u sha kawei pat ka kyrdan da kaba ong ba u pynleit jingmut ban pyntikna ba ka suk ka saiñ kan ïaineh ha ka Jylla. Ka jingjia ba dang shen ha Phulbari ha kaba u MDC ka NPP u donkti bad ka jingthombor ïa ki samla bad nonghikai kiba ïakhih da kaba jai-jai ha surok ban dawa ïa ka hok ka ïathuh ïa ka khana ba shisha shaphang u Myntri Rangbah, u Conrad Sangma.”
Utei u nongïalam ka TMC u la pynsngew ruh kumno u Myntri Rangbah u la pulom ha ka ban kyntiew ïa ki briew ha ki bynta bapher-bapher jong ka imlang-sahlang.
U la ong, “Haba u pynsngew ba u la wanrah ka jingsarong ïa ka Jylla ha kiba bun ki bynta, nga kynmaw kumno u la pynsarong ïa ki khun samla ka Jylla da kaba pulom ha ka ban pynbiang ïa ki lad ai kam ai jam bad pynduh jingkyrmen ïa ka lawei jong ki. Nga la kynmaw kumno u la pyntroiñ ïa ka tnad ka koit ka khiah ka Jylla jong ngi da kaba pulom ha ka ban pynbha ïa ka tnad. Nga la kynmaw kumno kane ka Sorkar ka la don ïa ka bynta ba kongsan ha ka ban kyntait ïa ka pule-puthi kaba paka sha ki khynnah jong ngi lyngba ka jingieh beiñ ïa ka tnad bad ka jingbym biang ha ki jingdon-jingem.”
Haba ñiew ïa kane ka Sorkar ba mynta ba ka bamsap, u Marak u la kynnoh ba kane kam dei ka Sorkar kaba trei ban khmih ïa ki jingdonkam jong ki paidbah, hynrei ka Sorkar kaba trei minot tang ha ki kam bamsap.
