Jowai, Rymphang: Ki Kyrtong (candidate) kiba wan ïalap ilekshon hapoh Shnong Demthring, la mana pyrshah ba kim bit ban ïalam paidbah hapoh shnong ha ka por ba long jingïalang paidbah (Public Meeting) hynrei la shah ïa ki tang 5 (san) tylli ki kali rit ba synran lang.
Ki nongkren jong ki kyrtong ki dei ban kren tang ïa ka nongrim bad ki jingthmu ba bha jong u kyrtong jong ki, hynrei la mana ba kim dei ban kynthoh ne kynnoh kulmar khlem ka nongrim kaba biang pyrshah ïa kiwei pat ki kyrtong ne ki seng saiñ pyrthei.
La mana pyrshah ïa ki briew kiba nabar shnong khamtam ki briew kiba nabar jong ka konstitwensi ba kim dei ban wan rung hapoh shnong poh thaw lane sha ki ïing ki sem khlem da ïoh jingbit na ka Dorbar Shnong ha kum kine ki por ban pynlong ïa ka ilekshon. Lada jia ba lap ïa kino kino kiba pyrshah ïa kine ki kyndon kiba la kdew haneng, yn pynshitom ïa ki kat kum ka aiñ shnong.
