Guwahati, Rymphang: Ki bor pahara ka Railway Protection Force (RPF) ha ka Lah Sngi U Blei mynta ka taïew ki la leit ban pynlong ïa ki jingkhynra kiba jur pyrshah ïa runar kiba ju donkti ban die tuh/beaiñ ïa ki tiket shong rel ha nongbah Guwahati, bad ha katei ka jingleit khynra jong ki, ki la ïoh ruh ban kem ïa 108 ngut ki runar kiba ju donkti ha kitei ki kam beaiñ.
Kat kum ka jingïathuh jong ki bor pahara ka RPF ki la pyntip ba ki tiket beaiñ ba la ïoh ban kurup ha katei ka sngi ki shongdor palat T.31.66 lak, bad ki dei kiba hapdeng u bnai Ïaïong tad haduh u bnai Nohprah jong u snem 2022.
Khnang ban pyntikna ba ki nongleit nongwan kin ïoh ïa ki tiket kiba janai, na ka liang ki bor pahara ka RPF ki la kyntu ïa ki paidbah nongleit nongwan ba kin thied ïa ki tiket shong rel tang na kito ki shlem trei kam, ki ‘website’ bad na ki ‘agent’ kiba la ïoh ïa ka jingithuh na ka sorkar.
Na ka liang ki bor pahara ka RPF ki la ïathuh ba kin dang ïai bteng ban pynllng ïa ki jingkhynra pyrshah ïa kum kitei ki jait kam beaiñ tad haduh ba yn da lah ban rat dyngkhong plain.
Kat kum ki jingïoh lum jingtip la ïathuh ba bun sien na ki nongleit nongwan kim ju ïoh satia ban thied ïa ki tiket shong rel namat ki ju don ki briew kiba ju thied lypa ïa ki khnang ba kin ïoh die beaiñ pat sha ki nongleit nongwan kiba donkam kyrkieh ha ka dor kaba kham rem.
Dei na katei ka daw ba ki bor sorkar ka RPF man la ka por ka ju leit ban pynlong ïa ki jingkhynra ha ki thaiñ bad ki jaka bapher bapher ym tang ha ka jylla Assam hynrei ruh ha kiwei kiwei ki bynta jong ka ri India.
