Kyiv, Rymphang:
U President ka Ukraine, u Volodymyr Zelensky u la kyntu ia ki ri ba marjan hadien ba ki Myntri ka tnat iada ri jong ka NATO ki la iakynduh lang ha ka Sngi Balang, ha kaba u la pan jingïarap kyrkieh ha kane ka por namar ka jingsdang tur biang jong ka Russia khamtam ha ki bynta jong ka nongbah Bakhmut.
La ong ba ka Russia ha kane ka por la i-kumba ka thmu ban thombor bad knieh biang ia ka nongbah Bakhmut namar kiba bun ki ‘namding ba la ther da ki shipai ka Russia ki dei kiba leit poi sha Bakhmut. Kumta ki shipai iada jong ka Ukraine ki don hapdeng ka jingeh kaba khraw hapoh katei ka nongbah.
Namar kumba la tip hi ba ka nongbah Bakhmut ka long ka lad ka ban pynsuk ia ka Russia ba kan ioh ban kurup sa ia ki 2 tylli ki nongbah ba heh jong ka Ukraine kynthup ia ki nongbah ka Donetsk, ka Kramatorsk bad ka Sloviansk lada ka ioh ban knieh shwa nyngkong ia ka Bakhmut kumba ka la thmu naduh ba sdang.
Ki Myntri ka tnat iada jong ka NATO ki la leit ban shong jingialang ha Brussels naka bynta ban ïakren halor ka thma hapdeng ka Russia bad ka Ukraine. Kumta ruh u Zelensky u la ong ba ka Russia ha kane ka por, ka la ialeh katba lah ban pynkloi ban ioh knieh noh ia kitei ki nongbah ka Ukraine hashwa ba kiwei pat ki ri kin ai jingïarap bad ai jingkyrshan ia ka Ukraine.
Namarkata u la ong ba ka Ukraine ka donkam ia ka jingïarap kaba kyrkieh bha ha kane ka por khnang ban pyllait im ia shibun bah ki mynsiem briew kiba don hapoh ka ri Ukraine.
Kumjuh ruh u heh ka NATO, u Jens Stoltenberg u la ong ba u President ka Russia u dang pynkhreh bad pyn-ap ban hiar thma jur biang ia ka Ukraine ha ki por bym lah tip.
Namar ba ka jingleit hiar thma jong ka Russia ia ka Ukraine ka la jan dap tad shi snem, ka Russia ka la sdang ruh ban pyni bor biang khamtam ha ki thaiñ South bad East jong ka Ukraine.
Ka Russia ka la ther ‘namding dusmon ruh sha ki nongbah ba don ki karkhana bad ki shlem treikam bapher jong ka Ukraine kum ha Kostyantynivka bad Kramatorsk, kiba don sha ka thaiñ Donetsk.
La ong ba ki la don ruh katto katne tylli ki ri kiba la pynbna bad kular ban phah ia ki tup iakhun thma bad ki liengsuiñ iakhun thma jongki sha ka Ukraine naka bynta ba kan ioh ban iada ia la u jong u pud u sam ha ka jingshah hiar thma ba khlem sangeh jong ka Russia.
