Shillong, Rymphang:
U National General Secretary ka BJP, u Rituraj Sinha u la ong ba kano-kano ka ‘vote’ kaba leit sha ka Congress ka long ka ‘vote’ kaba leh nohei.
U Sinha u la pynpaw ïa kane haba kren sha ki lad pathai khubor hadien ka jingpyllait ïa ki mat treikam ka seng (BJP) ha ka Sngi Balang.
“Haba phai sha ka Congress, baroh ha Meghalaya ki tip…ki briew hangne kiba stad, ba kano-kano ka ‘vote’ kaba leit sha ka Congress ka long ka ‘vote’ kaba leh nohei namar ka Congress kan ym ïadon bynta bad ka Sorkar,” la ong u Sinha.
“Mano ba kwah MLA u ban shong ha ka liang pyrshah na bynta 5 snem bad ym lah ban leh eiei na bynta ki briew jong ka konstitwensi,” la buh jingkylli utei u nongïalam.
Haba kren shaphang ki mat ilekshon ka seng, u la ong ba ka jingïapher kaba hakhmat eh hapdeng ki mat ilekshon ka BJP bad kiwei ka long ba ki don ki seng kiba ïalap ilekshon shane-shatai ha kylleng sawdong, hynrei kim shym don ha ka ilekshon jong ka Jylla ha u snem 2018.
“Ki pynsngew ïa ki jingkular ba heh jong ki, nga kwah buh jingkylli ïa ki nong Meghalaya, hato kine ki seng kin don ha ka ilekshon 2028, ym don ba tip tikna ïa kane…ki don hangne na bynta ki kam jngoh kai ilekshon ne ka ‘Election Tourism,” u la ong.
Ha kajuh ka por, haba kynthoh ïa ka TMC, u la ong ba u ‘T’ u ïeng na bynta ‘Tola Bazzi’, ‘M’ na bynta ‘Mass Bangladeshi Infiltration’ bad ‘C’ na bynta ‘Cut Money’ bad ‘Corruption’.
“Phi dei ban leit jngoh ïa ka Bengal ban peit kaei kaba ki leh,” la ong u Sinha.
Shuh shuh haba kdew ba ki mat ilekshon jong kiwei pat ki seng ki lah ban long ki bym da shong khia, u Sinha ha kawei ka liang u la bynrap ba ki mat ilekshon ka BJP ki dei ka thup jong ka jingïohi jngai bad ka jingshim rai ïa kaba la pynskhem hapoh jong u Myntri Rangbahduh ka ri, u Narendra Modi.
“Ngi kyrpad ïa ki nongshong shnong ka Jylla ban pynkup bor ïa ka Meghalaya…kaba mut u Modi na bynta ka Meghalaya. Ai lad shisien ïa ngi bad phin ïohi ka jingkylla,” la ong u National General Secretary.
