Shillong, Rymphang:
Ka Khasi Students’ Union (KSU) NEHU Unit ka la leit ban ai da ka jingmaham kaba tyngeh ïa ka Associate Professor jong ka English Literature Department halor ka jingpyndik, bad ñiew beiñ ïa ki samla pule kiba dei ki Khasi.
Ki nongïalam ka KSU NEHU Unit ha ka 13 tarik mynta u bnai ki la leit ban maham tyngeh ïa kane ka Associate Professor ka English Literature, kaba bat ruh ïa ka kyrdan Director jong ka Skulbah English and Foreign Language University (EFLU), Shillong Campus kaba don hapoh ki saw kynroh ka Skulbah NEHU kaba kyrteng ka Dr. Mousumi Guha Banerjee.
Kane ka jingleit maham ka KSU ka dei hadien ba ki la ïoh ka jingujor na ki katto katne ki samla Khasi kiba pule ha katei ka skul bah halor ka jingleh shiliang khmat, leh ñiew beiñ, ban beiñ bad ka jingpyndik ïa ki samla pule Khasi na ka por sha ka por. Kumta ka pynlong ïa kiba bun ngut ki samla Khasi ban pynkut noh shiteng por ïa ka jingpule na katei ka skulbah na ka daw ka jingbym lah shah shuh ïa ka jingleh ñiew beiñ jong katei ka nonghikai.
Haba la ïohsngew ïa ki jingujor, mar mar ka seng ka la leit ban ïakynduh markhmat bad katei ka Associate Professor ha ka shlem treikam ka jongka. Ha katei ka jingïakynduh ka nonghikai ka la kyntait ïa kitei ki jingkynnoh, hynrei haba ki dkhot ka seng ki la buh ka jingkylli ba kumno pat ba ki bun ki samla pule Khasi kiba ieh noh shiteng por ïa ka jingpule na katei ka skul bah bad bun na ki, ki dei na ka tnat pule ka jongka, katei ka Nonghikai ka khlem lah ban ai ka jubab kaba shai satia.
Shuh shuh ka seng ka la ai da ka jingmaham ba tyngeh ïa kane ka nonghikai da ka buh artad ïa ka jingmana ba lada kum kine ki jingjia kin jia biang nangne shakhmat pyrshah ïa ki samla pule Khasi, ka seng hi khlem jingmap kan shim ki sien jam ba tyngeh eh ïa katei ka nonghikai.
