Napier, Rymphang: Katkum ki khubor la ong ba ka jingiap jong ki briew ka la sdang ban kiew na ka jingwan lynshop ka ‘erlangthari Gabrielle hapoh New Zealand, ha kaba ka jingiap jong ki briew ka la poi 8 ngut katkum ka kaiphod ba la ioh lum tad haduh jong ka step Sngi Thohdieng.
La ong ba katei ka ‘erlangthari ka la jah bad jaijai noh sha ki bynta South jong ka Pacific hynrei ka la pynjot bad pynjulor ia shibun ki jaka hapoh New Zealand bad khamtam ha ka North Island.
Kumba 10,000 hajar ngut ki briew ki la shah pynkynriah noh na ki katto katne ki shnong kiba la ithuh ba katei ka ‘erlangthari kan wan iaid lynti bad kumta ruh la bun tylli ki nongbah bad ki shnong kiba la duh ia ka um dih bad ka bor ding ilektrik naduh ka jingwan lynshop jong katei ka ‘erlangthari ha ki khyndiat sngi ba la leit.
La ong ruh ba ka la don kawei ka longiing kaba kynthup ia ka kmie, u kpa bad 2 ngut ki khun jongki, kiba la sahkut hapoh ka iingsah jongki ha ka por ba katei ka ‘erlangthari ka wanrah ia ka jingshlei um ha ka thaiñ Bay jong ka Hawke.
Kumta, kitei ki 4 ngut ki la pyrshang ban phet na katei ka iing jongki shalor ki iing jong kiwei pat ki para marjan hynrei la ong ba namar ka jingshlei um ka la jur, baroh hi ki la shong halor ka um. Tang hadien khyndiat por la ong ba ka um heh ka la wan bad rat ia i khun ba dang 2 snem shiteng bad i la ngam jyllop noh syndon ha katei ka por.
Kumjuh ruh na ka liang u Myntri Rangbahduh ka New Zealand, u Chris Hipkins u la pynpaw ka jingsngewkhia halor jong katei ka lanot ba ki paidbah ka ri ki hap ban mad ha kum kane ka por bad kumta ruh u la phah ia ka khubor sngewlem sha kito ki loniing kiba la duh noh ia ki baieid- bathoiñ ki jongki ha kane ka por.
Hynrei u la ong ba u pynshlur pat ia ki paidbah ba kin ym kynran dien hynrei kin iakhun bad shah shitom ia mynta shipor katba ki bor pyniaid ruh ki dang ialeh ban pynbiang ia ki jingdonkam jongki bad ban ialeh katba lah ruh ban pyllait im ia ki paidbah na kitei ki jingma kiba ap ia ki lyngba jong katei ka ‘erlangthari, kaba la wanrah ia ki jingshlei um bad kumjuh ruh ki jingtwa khyndew.
