Aizawl, Rymphang: U Symbud Myntri Rangbah jong ka jylla Mizoram, u Tawnluia ha kane ka taiew kaba mynta u la pynbna ba ka sorkar jylla hapoh ka skhim Jal Jeevan Mission (JJM) ka la shim ïa ki sienjam kiba kyrpang ban pynbiang ïa ka um bam um dih sha baroh ki longïing longsem kiba na ki thaiñ nongkyndong. U la pynbna ba ïa katei ka kam yn sa lah ban pyndep hapoh u bnai Nohprah jong une u snem ba mynta. U Myntri u la pyntip ba hapoh katei ka skhim yn pynkynthup ïa palat 700 tylli ki shnong kiba na ki thaiñ nongkyndong ka jylla Mizoram.
Haba ai jubab ïa ka jingkylli na u MLA ka Mizo National Front (MNF) – Ramthanmawia, na ka liang u Tawnluia u ba dei ruh u Myntri u ba dei khmih ïa ka tnat Public Health Engineering u la ïathuh ba tad haduh kane ka kynti kaba mynta na ka liang ka sorkar jylla lyngba ka Functional Household Tap Connections (FHTC) ka la lah ban pynbiang ïa ka umbam umdih sha baroh ki longïing ha ki 263 tylli ki thaiñ nongkyndong. U la ïathuh shuh shuh ba ki don sa 465 tylli ki shong nongkyndong kiba ka sorkar kan sa pynbiang ïa ka um bam um dih lyngba ka FHTC.
Na ka liang u Tawnluia u la ïathuh shuh shuh ba watla ka tarik ba khatduh ban pyndep trei kam ïa ka skhim JJM ka dei ha u snem 2024, na ka liang ka Sorkar Pdeng ka la bthah ïa ka sorkar jylla ba ka dei ban pyndep ïa katei ka skhim hashwa ban kut une u snem ba mynta. U la ïathuh ba na ka liang ka sorkar jylla kam lah ban pyntikna la ïa katei ka skhim yn lah ne em ban pyntreikam kat kum ka tarik ba la bthah da ka Sorkar Pdeng.
Ha ka jingai jingkren jong u Myntri, u la ïathuh shuh shuh ba hapoh ka skhim JJM, ki la don haduh 11 tylli ki shnong kiba ka sorkar jylla ka la lah ban pynbiang ïa ka umbam umdih da kaba pyndonkam da ki solar water pump. U la pyntip ba na ka liang ka sorkar jylla ka la shim ïa ki sienjam kiba kyrpang ban pynbiang ïa ka umbam umdih sa sha 175 tylli ki shnong da kaba pyndonkam da ki solar pump.
