Shillong, Rymphang: Ka seng All India Congress Committee (AICC) kumba ju long ka la ïai ai mynsiem ïa ki kynthei bad ki longkmie ba kin ïashimbynta ha ka kam saiñ pyrthei bad ka seng ka la ïoh ruh ïa shibun ngut ki nongmihkhmat, ki Myntri kynthei hapoh ka jylla, kiba bat bad pynïaid ïa ki kam hapoh ka seng, ki MP kynthei hapoh Rajya Sabha, ki dkhot ka National Women’s Commission kiba dei napoh ka jylla.
Haba kren sha ki lad pathai khubor halor ka ilekshon ka ban sa long ha ka 27 tarik u bnai Rymphang 2023 bad halor ki mat kiba ïadei bad ka jingpynkupbor ïa ki kynthei ha ka sngi Palei ha Congress Bhawan ha ryngkat ka jingïadonlang bad ka President ka Meghalaya Pradesh Mahila Congress, ka Kong Joplyn Shylla, ki kyrtong longkmie na ka seng Congress ha ka sngi Palei, ka Bobbeeta, ka la ong ba ka seng Congress ka ngeit ruh ba ka donkam ïa ki kynthei bad ki longkmie ba kin ïashimbynta ha ka ban ai ïa ka rai ha ka liang ka synshar ka khadar. Ha kane ka kynti kaba mynta ka seng hapoh ka jylla ka la sei ïa 10 ngut ki kyrtong kynthei kiba shemphang bad kiba stad ba kin ïakhun ïa ka ilekshon MLA ka ban sa long ha ka 27 tarik u bnai Rymphang 2023.
“Kaba rit duh ka kyrtong ka seng ka dei kaba dang 28 snem ka rta. Ngi sngewkmen ba ki la wan shakhmat ban shakri ïa ki paidbah ka jylla Meghalaya lyngba ka seng Congress. Ngi kyntu ruh ïa ki kynthei ka jylla ba kin wan shakhmat ban ai ka jingkyrshan ïa ki kyrtong kynthei jong ngi,” la ong ka Bobbeeta.
Ki 10 ngut ki kyrtong kynthei ba ka seng Congress ka la sei ha kane ka ilekshon ka ban sa long ki kynthup ïa ka Kong Jhanika Siangshai na Khliehriat, ka Kong Rona Khymdeit na Nongpoh, ka Kong Bethleen Dkhar na West Shillong, ka Kong Venetia Pearl Mawlong na South Shillong, ka Kong Banidashisha Kharkongor na Nongthymmai, ka Kong Lakyntiew Sohkhlet na Sohra, ka Kong Pynhunlang Nongrum na Mawkynrew, ka Kong Victorealness Syiemlieh na Ranikor, ka Deborah C Marak na Williamnagar bad ka Uttora G Sangma na Ampati.
