Shillong, Rymphang: Ka Bobbeeta Sharma kaba dei ka Media Coordinator ka All India Congress Committee (AICC) ka la ong ba ka seng Congress ka kwah ban wanrah shibun ki jingai myntoi na ka bynta ki longkmie kynthei khnang ba kin lah ban ïeng ha la ki jong ki kjat, ba kin don ka bor bad ba kin lah ban kamai dalade.
Haba kren sha ki lad pathai khubor halor ka ilekshon ka ban sa long ha ka 27 tarik u bnai Rymphang 2023 bad halor ki mat kiba ïadei bad ka jingpynkupbor ïa ki kynthei, ha ka sngi Palei ha Congress Bhawan ha ryngkat ka jingïadonlang bad ka President ka Meghalaya Pradesh Mahila Congress, ka Kong Joplyn Shylla, ki kyrtong longkmie na ka seng Congress, ka Bobbeeta ka la ong ba ki kynthei ki long kum ki païa baskhem hapoh ka ri synshar paidbah bad kiba wanrah ïa ka roi ka par hapoh ka jylla.
“Ngi kum ki kynthei, ngi sngew sarong ba ka jylla Meghalaya ka dei kaba ai jait sha ka kynthei ha kaba ki kynthei ki don ïa ka bor bad ha ka jaka kaba khlaiñ bha. Ïa ki kynthei ha ka jylla Meghalaya la tip ba ki dei kiba trei shitom bad kiba trei bha. Watla ïohi ba bun na ki kynthei ki dang hap ban ïaid ka lynti kaba jrong ba kin lah ban ïeng ha la ki jong ki kjat bad ban ïoh ban kamai dalade. Lada ka kynthei ka lah ban ïeng ha la ki jong ki kjat, ka lah ban shim ïa ka rai na ka bynta ïalade bad na ka bynta ki khun ki kti jong ka bad na ka bynta ka lawei jong ka ïing ka sem. Ka seng Congress ka sngap ïa ka jingdonkam jong ki longkmie ka jylla Meghalaya ba kin lah ban don ïa ka tyllong ban pynmih pisa khnang ba kin lah ban kyrshan ïalade bad ïa ka ïing ka sem ka jong ki,” la ong ka Bobbeeta.
Kumta na ka liang ka seng Congress khnang ba kan nang aibor shuh shuh ïa ki kynthei bad ïa ki longkmie, ha kane ka kynti kaba mynta ruh ka la khlei biang sa shisien ïa ki jubanlak lane ki mat jingkular ilekshon ki jong ka lada ka wan ha ka bor kiba kynthup ban pynïoh jingsumar ei sha ki paidbah nongshong shnong ka jylla lyngba ka skhim Free Health Care Scheme, ka seng ka la buh ïa ka thong ruh ban ïarap ïa ki kynthei ha ka ban seng kam seng jam, ban ai jingïarap pisa kaba T.3000 sha ki longkmie kiba kit khunrei kiba dei na ki longïing longsem ba duk kiba hap hapoh ka Below Poverty Line (BPL), ban pynshong skul ei ïa ki khynnah kynthei naduh ka klas kaba rit haduh ka klas 12 khnang ban plie ka lad ka lynti ïa ki khynnah kynthei ba kin ïoh ïa ki jingangnud bad ki jingthrang ki jong ki.
Shuh shuh ka seng Congress kan ai jingïarap ruh sha baroh ki longïing longsem kiba duna ha ka ïoh ka kot bad kiba hap hapoh ka BPL ïa ki jingtap tnum ïing, ka seng kan ai ei ruh 200 unit ka bording sha baroh ki longïing longsem kiba duna ha ka ïoh ka kot bad kiba hap hapoh ka BPL, ka seng kan ai ei ruh ïa ki tyndong lyer shet jingshet lane ki LPG Cylinder kiba hap hapoh ka BPL, ka seng kan thaw ruh ïa ka ïew die jingdie ha kaba ïa ki mar ki mata kiba don ïa ka jingthoh “Proudly Made in Meghalaya” yn sa pynïaid ha katei ka ïew bad ka seng ka la kular ruh kan thaw da ka Special Urban Police Force ka ban dei ka kynhun ka ban don ka jingïajan bad ki paidbah bad ka ban tehlakam ïa shibun ki jingjia kiba sniew da kaba pyndonkam ïa ki tiar ki tar kiba mynta bad katei ka kynhun kan ai jaka ruh ïa ki kynthei ba kin don bynta.
