Itanagar, Rymphang: U Lieutenant General ba la shongthait, u Kaiwalya Trivikram Parnaik ha ka 16 tarik mynta u bnai u la bam smai ban shimti ïa ka kam kum u Lat ba thymmai jong ka jylla Arunachal Pradesh. Ïa ka jingïalang bam smai ha katei ka sngi la pynlong ha Raj Bhavan, Itanagar. Ha katei ka sngi ïa u Parnaik la pynbam smai da u Justice Nani Tagia – nongïasaid jong ka Gauhati High Court.
Ha katei ka jingïalang bam smai la wan ban ïashim bynta lem da u Myntri Rangbah ka jylla – Pema Khandu, ki dkhot ka Kynhun Myntri, ki MLA, ki heh sorkar bad kiwei kiwei ki kynrem ki lyndan.
U Parnaik u la shimti ïa ka kam kum u Lat jong ka jylla Arunachal Pradesh na u BD Mishra, u ba la leit ban shimti noh ïa ka kam kum u Lieutenant Governor ba thymmai jong ka Ladakh. U BD Mishra u la shimti ïa ka kam kum u Lat ka jylla Arunachal Pradesh ha ka 3 tarik u Risaw, 2017.
