Shillong Rymphang 17:
Katba ki sngi ban thep vote ki la nang jan, ki jingjia kiba ïadei bad ka jingïakynad ilekshon ruh ki la jia ha kine ki sngi, ha kaba na ka liang ki bor pynïaid ilekshon ryngkat ki pulit ki la nang buh jingkheiñ ruh ïa ki jaka thep vote kiba don jingma bad kiba kham don shuh shuh ha ka jingma.
Na ka liang u Chief Electoral Officer ka Jylla, u Bah F R Kharkongor u la ïathuh ba hadien ka jinglum jingtip khamtam ka jingpeit thuh ïa ka jinglong jingman na ka liang ki pulit, la lap ba ki don 323 tylli ki jaka thep vote kiba jur bha ka jingma, bad 640 tylli ki jaka thep vote ki dei kiba don jingma tangba kim da dei katta katta.
U la ong ba ki don ruh 84 tylli ki jaka thep vote kiba hap lang ha ka thup kiba don jingman bad kiba kham don jingman shuh shuh.
La nang pynkhlaiñ ruh ïa ka jingpahara da ki pulit CRPF bad ki pulit ka Jylla ha ki jaka kiba lah ban mih ka kynrum kynram bad jingïakynad ilekshon.
Baroh ki jaka thep vote kiba saphriang ha kylleng ki 60 tylli ki konstitwensi, ki don 3,482 tylli.
