Rymphang: Ka Election Commission ka ri India ka ju pynlong ïa ka ilekshon ha kylleng ki Jylla ha la kajong kajong ka por bad snem katkum ka jingïaid ka samoi treikam kaba san snem. Ka Election Commission ka la ai kyrteng ïa ka ilekshon kum ka tamasa synshar paidbah (festival of democracy). Ha ka por ilekshon, ka dei shisha ka tamasa, namar ki paidbah ki shad ki kmen na ka bynta ki kyrtong bad ki seng saiñ pyrthei kiba ki sngewdei ban kyrshan.
Kane ka tamasa ka long kaba shongshit, bad don ka por ba ka jingshongshit ka poi shaduh ka jingshong syier. Hynrei ha ki ilekshon ba la leit noh ha ki phew snem mynshwa, ki paidbah haba ki shongshit ilekshon, ki shongshit halor ka nongrim ba ki kyrshan ïa ki kyrtong kiba don ka jingnang jingtip bad jingshemphang ban leit mihkhmat sha ka Ïingdorbar Thawaiñ ka Jylla. Katba nang tyllun ki snem, ka jinglong bad jingpyrkhat ki briew ruh ka la nang kylla.
Ha ka por ba dang shu ïoh shen ïa ka Jylla Meghalaya, lah ban ong ba ka jingdon kiba nang thoh nang pule ha Meghalaya ka dang duna lada ïanujor bad mynta. Tangba ka pyrkhat ka pyrdaiñ ki briew ha kito ki por, ka long kaba khlaiñ, bad halor ka nongrim kaba skhem. Ki nongthep vote ha kito ki por ki long kiba pyrkhat jngai bad ha kito ki por, dei ki paidbah kiba ïit ïa ki briew kiba don ka jingnang jingtip bad jingshemphang ban mih shakhmat ban ïakhun ilekshon. Ki paidbah ki trei na ka bynta ki kyrtong bad ki da synñiang wat ïa ka pisa na ka bynta ki katto katne ki jingdonkam ban pyntyllun ha ka por ilekshon. Lah ban ong ba ka ilekshon ha kito ki por ka long kaba tad.
Ha kine ki khyndiat snem, ka ilekshon sha ka Ïingdorbar Thawaiñ ka Jylla, ka kylla bad ka long kaba rem, bad ishyrkhei ban peit. Ki nongïakhun ilekshon mynta la kham bun kiba hehspah, ha kaba ka jaka jong kane ka tamasa synshar paidbah ka la bthuh bad sop da ki pum-pum jong ka bor ka pisa. Haba ki briew kiba bun pisa ki mih ban ïakhun ilekshon, ki la pynap lypa da u khwai bad shana kumno ban pynbiej ïa ki paidbah. Ki paidbah ruh ki la klet noh ban pynshong nongrim ba ka ilekshon ka dei kum ha kito ki phew snem kiba la leit. Ki paidbah khamtam kiba duna ka ïoh ka kot, ki la shah buh lypa ha ka thup kyrteng jong ki kyrtong hehspah kumno ban khwai ïa ki da ka pisa. Haba ban ka duk ka jynjar, ym don jingpynshoi da kawei pat kaba kham halor ban ïa ka pisa. Wat kiba la bit la biang ruh ki tur sha kita ki kyrtong kiba lah ban pynbiang ïa ki jingdonkam shimet jong ki. Kane ka jia mynta ynda ka Jylla ka la bun ki nongshong shnong kiba la nang la stad.
Kumta, kat nang stad, nang khongpong ka jingpyrkhat. Kum ki paidbah nongjied, la kum liat ha ka jingriam kaba la pynkylla khongpong wat ïa ka rukom pyrkhat, ha kaba ki dang shemphang pynban ki nongjied ha kito ki por ba dang duna kiba nang ban thoh bad soi kyrteng. Haba ngi thung diengsoh, ngi hap ap katto katne snem ba un heh un san bad pynmih soh. Kumjuh ruh ha ka ilekshon, ngi dei ban sei shwa ïa ki kyrtong ki ban long u nongmihkhmat, kiba ngi khmih lynti ba ynda la shahjied, kin wan ki jingmyntoi sha ki paidbah. Hynrei ha kane ka juk kaba mynta, la liat ha ka jingpyrkhat khongpong, ha kaba ki paidbah ki ïoh kheit soh shwa khlem thung, kaba mut, ki paidbah ki ïoh jingmyntoi shwa na kito kiba khreh ban ïashimbynta ha ka tamasa synshar paidbah. Kat kiba lah ban sam ki jingmyntoi shimet, bad ha ki shnong ki thaw, kita ki kyrtong ki kham paw bad kham wan shakhmat ha ka jingïakhun.
Ka por ka la dei ba ka juk barim ka juk bashida kan wanphai biang ha ka jingmut jingpyrkhat jong iwei-pa-iwei ki nongshong shnong kane ka Jylla khnang ban ïoh shisha ïa ki nongsynshar kiba tip bad kiba shemphang ban ïalam bad synshar ïa ka Jylla.
