Beijing, Rymphang: Ka China ha ka Sngi Palei ka la pynngat kyndon pyrshah ïa ka Lockheed Martin Corporation bad ïa ka kynhun ki nongialam jong ka Raytheon Technologies halor ka jingiadon bynta ban shalan ïa ki tiar siat sha Taiwan, kane ka long hadien ba ka China ka la khang pyrshah ïa baroh ki kompeni jong ka ri ba kim bit ban shalan tiar ne ban iadie- iathied bad ki kompeni ka U.S. Ka long ruh hadien ba ka China bad k US ki la sdang iakynad naduh ka por ka jingleit jurip jong ka Nancy Pelosy sha katei ka ri dew lynnong Taiwan ha ki khyndiat bnai ba la leit, ha kaba ka China ka la pynkilan ïa ki shipai jongka bad phah iaid tawiar ïa ka Taiwan ha katei ka por namar ka China kam kwah ïa kino kino ki bor ba nabar ba kin leit ban iadon bynta hapoh Taiwan.
La ong ba ka Lockheed Martin Corp bad ka Raytheon Missile& Defence Corp, ki la shah khang pyrshah ha ka sorkar China ban thied ne die ïa ki tiar kiba iadei bad ka China.
La ong ba ka Raytheon Technologies ka la die ïa ki tiar liengsuiñ Pratt & Whitney engine, kumjuh ruh ïa kiwei de ki tiar liengsuiñ kiba ka la pynpoi sha China ha kine ki khyndiat por ba la leit.
Katba na ka liang jong katei ka kompeni, ka la kyntait ïa katei ka jingkynnoh bad ka la ong ba kam shym la phah tiar eiei sha China tad haduh kine ki sngi naduh ba ka China ka la khang ïa ka jingiadei kam bad ki kompeni na United States.
Hynrei, la ong ba ka Lockheed, ka ju shalan tiar sha palat 70 tylli ki ri bad katei ka kompeni ka la ong ba ka ju shalan tiar sha kitei ki ri bapher lyngba ka jingiatip lang jong ka sorkar bad kumta ka long hi ka jingiadei kam bad ka jingiadie- iathied na ka sorkar bad kiwei pat ki sorkar. Namarkata, kam shym dei ka rai shimet jong katei ka kompeni.
Ha u Rymphang jong u snem ba la leit, ka China ka la pynngat kyndon ïa kitei ki 2 tylli ki kompeni halor ka jingphah ïa ki tiar siat ba la poi kumba $100 million sha ka Taiwan.
Shuh shuh ruh la ong ba ka China naduh ki snem 2019 bad 2020, ka la dep pynngat kyndon bad khang pyrshah ïa kitei ki kompeni, watla naduh katei ka por, ka China kam pat don daw eiei ïa ka US haba iadei bad ka Taiwan.
Kumta ruh katei ka kompeni ka la ong ba watla katta, ka United States katkum ka aiñ Taiwan Relations Act 1979, ka la dep iasoi ban pynbiang ïa ka Taiwan da ki tiar iada khnang ba ka Taiwan kan lah ban iada ialade na ka jingshah pyni bor ne jingshah thombor ha kiwei pat ki bor ba nabar.
